SQO-da bıyl esirtki taratyp, satqan 132 adam ustaldy
PETROPAVL. KAZINFORM – Soltústik Qazaqstan oblysynda esirtkimen qolǵa túskenderdiń ishinde 13 áıel bar.
SQO polıtsııa departamenti baspasóz qyzmetiniń málimetinshe, Petropavlda sıntetıkalyq esirtki taratty degen kúdikpen 48 jastaǵy áıel ustaldy. Tártip saqshylary onyń sómkesinen qyzǵylt tústi krıstall tárizdi zat salynǵan 15 túıinshek tárkiledi.
Keıin ustalǵan áıel buǵan deıin jasyryp ketken «qaltalardyń» turǵan jerin kórsetti. Tárkilengen sıntetıkalyq psıhotroptyq zat - α-PvP-tyń jalpy salmaǵy 40 gramǵa jýyq boldy. Bul shamamen 300 ret qoldanýǵa bolatyn dozaǵa teń.
Osy derek boıynsha qylmystyq is qozǵaldy. Kúdikti qamaýǵa alyndy. Oǵan 7 jyldan 12 jylǵa deıin bas bostandyǵynan aıyrý jazasy qarastyrylǵan. Jedel aqparatqa sáıkes, áıel esirtki satýmen tamyz aıynan beri aınalysqan. Ádette «kásiptiń» bul túrimen úsh aıdan artyq aınalysa almaıdy.
Jyl basynan beri oblys aýmaǵynda esirtki satty degen kúdikpen 132 adam, sonyń ishinde 13 áıel ustaldy. Polıtseılerdiń aıtýynsha, árbir turǵyn esirtkiniń taralýyna qarsy kúreske óz úlesin qosa alady. Esirtki qylmysyna qatysty kez kelgen derek týraly esirtki qylmysyna qarsy is-qımyl basqarmasynyń táýlik boıy jumys isteıtin senim telefonyna 8 (7152) 39-41-93, WhatsApp nómirine +7-707-500-95-65 habarlaı alady.
Buǵan deıin Oralda esirtki saýdasymen aınalysqan eki stýdent qyz ustalǵanyn jazǵan edik.