SQO-da bıyl 660 adam rýlde mas kúıde ustalǵan
PETROPAVL. KAZINFORM – Soltústik Qazaqstan oblysynda ótken jeti aıda 231 jol-kólik oqıǵasy tirkeldi. Saldarynan 21 adam mert bolyp, 315-i jaraqat alǵan. Jol apattarynyń 192-si júrgizýshilerdiń, 15-i – júrginshilerdiń kinásinen boldy.
Bul týraly óńirlik kommýnıkatsııalar qyzmetinde ótken brıfıngte aıtyldy. Oblystyq polıtsııa departamenti jergilikti polıtsııa qyzmeti basqarmasy basshysynyń mindetin atqarýshy Grıgorıı Tyshtyń aıtýynsha, ótken jylmen salystyrǵanda jol-kólik oqıǵalarynyń sany shamamen 50-ge artqan.
«Júrgizgen taldaý nátıjesinde jol-kólik oqıǵalarynyń basym kópshiligi juma-senbi bolatyndyǵy anyqtaldy. Basty sebep - erejeni saqtamaý. Qıylystan durys ótpeýden - 70, júrginshilerge jol bermeýden 16 jol-kólik oqıǵasy boldy.
Jalpy óńirde jol qozǵalysy tártibin buzǵany úshin 41 myńnan astam quqyq buzýshy ákimshilik jaýapkershilikke tartylǵan. Olardyń 6953-i belgilengen jyldamdyqty asyrsa, 660 júrgizýshi kólik tizgininde mas kúıde bolǵan», - deıdi Grıgorıı Tysh.
Sonymen qatar, jol qozǵalysy erejelerin óreskel buzýdyń 19 myńnan astam faktisi tirkeldi. Qazirgi ýaqytta joldarda jyldamdyq rejımin qadaǵalaý úshin arnaıy jabdyqtalǵan eki «Kıber-Sherıf» kóligi júr. Al respýblıkalyq mańyzy bar joldarda 15 patrýldik baǵyt kezekshilik atqarady. Petropavlda tártipti 14 avtopatrýl qadaǵalasa, aýyldyq jerlerde bul mindet polıtsııanyń ýchaskelik ınspektorlaryna artylǵan.
«El aýmaǵynda jańa oqý jyly qarsańynda balalardyń joldaǵy qaýipsizdigin qamtamasyz etý maqsatynda 26 tamyz ben 6 qyrkúıek aralyǵynda «Nazar aýdaryńyz, balalar! » aktsııasy ótip jatyr. Osy is-shara barysynda patrýldik baǵyttar bilim berý uıymdarynyń janynda jumys isteıdi, ákimshilik polıtsııa qyzmetkerleri jalpy bilim beretin jáne mektepke deıingi mekemeler ornalasqan jerlerde jol jelisiniń jáne kólik qozǵalysyn uıymdastyrýdyń tehnıkalyq quraldaryna tekserý júrgizedi», - dedi Grıgorıı Tysh.
Polıtsııa qyzmetkeriniń aıtýynsha, ótken jeti aıda balalardyń qatysýymen 55 jol-kólik oqıǵasy tirkelgen. Saldarynan, bir bala mert bolyp, 65-i jaraqat aldy.
Buǵan deıin Petropavl turǵyny ınternet alaıaqtyqpen aınalysyp, 16 adamnyń atynan onlaın nesıe alǵanyn jazǵan edik.
