SQO-da bıyl 53 myńǵa jýyq adam onkoskrınıngten ótti

  PETROPAVL. KAZINFORM – Mindetti áleýmettik medıtsınalyq saqtandyrý aıasynda onkologııalyq skrınıngterge Soltústik Qazaqstan oblysynda 313 mln teńgeden astam qarajat jumsaldy.

Áleýmettik medıtsınalyq saqtandyrý qorynyń oblystyq fılıaly dırektory Aınagúl Davletchınanyń aıtýynsha, onkologııalyq skrınıngter tegin medıtsınalyq kómektiń kepildik berilgen kóleminiń tizbesine engizilgen. Bul jańashyldyq onkologııalyq aýrýlardy erte anyqtaýǵa oń áser etpek.

- Óńirde MÁMS júıesinde 91 038 myń adam saqtandyrylmaǵan. Búgingi tańda onkoskrınıng MÁMS júıesindegi saqtandyrý mártebesine qaramastan barlyq azamattar úshin qoljetimdi, - deıdi Aınagúl Davletchına.

Jyl basynan oblysta sút bezi obyryna – 16 868 adam, jatyr moıny obyryna – 12 436 adam, kolorektaldy obyrǵa 23 577 adam tekserildi.

- 30 jastan asqan áıelder jatyr moıny obyryna onkoskrınıngten ótýi kerek, jıiligi 4 jylda 1 ret. Búgingi tańda osy jastaǵy áıelderdiń 90% qamtý maqsaty tur.

Sút bezi obyryna 40 jastan bastap tekseriledi. Onyń jıiligi eki jylda bir ret. Bıyl áıelderdiń 80% qamtylmaq.

Jasy 50-den asqandarǵa qýyq asty beziniń qaterli isigine onkoskrınıng bar. Erlerdiń 70 % qamtý maqsaty tur. Er adamdar eki jylda bir ret tekseristen ótip turýy tıis, - deıdi fılıal dırektory.

Sonymen qatar, onkosrınıngten onkologııaǵa tuqym qýalaıtyn beıimdiligi bar adamdar, sozylmaly aýrýlary bar nemese jaman ádetteri - temeki shegetin, alkogoldi shamadan tys paıdalanatyn adamdar ulttyq skrınıngtik baǵdarlamalar aıasynda ótýi kerek.

- Endi 50-70 jas aralyǵyndaǵy er adamdarda mı qan aınalymynyń jiti buzylýyn erte anyqtaý skrınıngi kózdelgen. Bul profılaktıkalyq tekserý aýrýdyń alǵashqy belgiler paıda bolǵanǵa deıin anyqtaýǵa múmkindik beredi. Adamnyń esh shaǵymy bolmasa da bul tekserýler qaýipti patologııalardy erte satysynda anyqtaýǵa jáne emdeýdi ýaqytynda bastaýǵa kómektesedi, - deıdi Aınagúl Davletchına.

Onkoskrınıng túrleri:

Mammografııa - qaterli isikti erte anyqtaý úshin sút bezderin zertteý. Bul 40 jastan asqan áıelderge eki jylda bir ret ótkiziledi.

Tsıtologııalyq zertteý (PAP-test) - 30 jastan asqan áıelderdi jatyr moıny obyryna tekserý.

Kolonoskopııa - 50 jastan asqan erler men áıelderde toq ishek qaterli isiginiń dıagnostıkasy.

PSA synaǵy (prostatıkalyq spetsıfıkalyq antıgen) - erlerdegi qýyqasty beziniń qaterli isigin anyqtaýǵa arnalǵan qan analızi.

Temeki shegýshiler men qaýip tobyndaǵy adamdarda ókpe obyryn erte anyqtaý úshin ókpeniń flıýorografııasy jáne KT júrgiziledi.

Jambasty ýltradybystyq zertteý – áıelderde isikterdi dıagnostıkalaý ótkizý úshin júrgiziledi. Sonymen qatar, sozylmaly jáne áleýmettik mańyzy bar aýrýlardy erte anyqtaý úshin profılaktıkalyq tekserýler turaqty negizde júrgiziledi.

Aınagúl Davletchınanyń aıtýynsha, skrınıngtik tekseristen bólek 59 myńǵa jýyq adam profılaktıkalyq tekseristen ótti. Oblysta qant dıabetin, arterııalyq gıpertonııany, júrektiń ıshemııalyq aýrýyn, glaýkomany, V jáne S vırýstyq gepatıtterin erte anyqtaýǵa arnalǵan skrınıngter 40-76 jas aralyǵyndaǵy erler men áıelder úshin 2 jylda 1 ret tegin júrgiziledi.

Al skrınıngten ótý qajettiligi týraly patsıentke emhanadan habarlasyp, SMS-habarlamalar jiberedi.

Buǵan deıin medıtsınalyq skrınıngten ótetin jumysshy 3 kún demalys alýǵa quqyly ekenin jazǵan edik.