SQO-da bıyl 500-ge jýyq ınternet alaıaqtyq deregi tirkelgen
PETROPAVL. KAZINFORM – Soltústik Qazaqstan oblysynda jyl basynan beri ınternet alaıaqtyq deregi 11% artqan. Qylmyskerler qoldanatyn aıla-amaldardyń ishinde bank qyzmetkeri bolyp qońyraý shalý áli de aldyńǵy orynda keledi.
SQO Polıtsııa departamenti baspasóz qyzmetiniń málimetinshe, bıyl oblysta ınternet alaıaqtyqqa qatysty 453 qylmys tirkelgen. Sonyń 205 jaǵdaıynda alaıaqtar turǵyndarǵa «bankten qońyraý shalyp turmyz» dep habarlasqan. Ekinshi orynda baılanys operatory bolyp habarlasý tur.
«Adamdardy aldap, quryqqa túsirý úshin qylmyskerler tutas spektakl oınaýǵa deıin barady. Máselen, «Sizge baılanys operatory qońyraý shalyp otyr. Sizdiń sim-kartańyzdyń jaramdylyq merzimi aıaqtalady, siz bul nómirdi odan ári paıdalanýdy josparlap otyrsyz ba?» dep áńgime bastap, jeke aqparatty bilýge tyrysady. Qazirgi ýaqytta WhatsApp-ta aýdıo qońyraý arqyly da jıi habarlasatyn bolǵan», - deıdi SQO Polıtsııa departamenti krımınaldyq polıtsııa basqarmasynyń bastyǵy Ivan Terzıdı.
Budan basqa alaıaqtar ózderin quqyq qorǵaý qurylymdary men banktik qaýipsizdik qyzmetiniń qyzmetkerleri retinde tanystyryp, aram oılaryn júzege asyrmaq bolady. Maqsat – jurttyń atyna iri nesıeler alyp, qarajatty ózderiniń «qaýipsiz shottarǵa» aýdaryp alý.
«Sondaı-aq, ınternet arqyly saýda-sattyq jasaǵan kezde óte abaı bolǵan jón, aldyn ala tólemge kelispeýdi usynamyz. Eshbir jaǵdaıda bóten adamdarǵa qupııa derekterińizdi senip tapsyrmańyz, AnyDesk, TeamViewer jáne basqa da beıtanys baǵdarlamalardy ornatýǵa kelispeńiz», - deıdi Ivan Terzıdı.
Internet alaıaqtyqtyń aldyn alý maqsatynda óńir polıtseıleri 13-15 tamyz aralyǵynda «Anti-fraud» jedel aldyn alý is-sharasyn ótkizip jatyr. Polıtseıler men jergilikti bılik ókilderi Petropavldaǵy saýda oıyn-saýyq ortalyqtarynyń birinde anımatordyń qatysýymen ınternet alaıaqtyq máselesine jurttyń nazaryn aýdardy. Tártip saqshylary ásirese egde jastaǵylarǵa ınternet-alaıaqtyqtyń keń taraǵan shemalary týraly jadnamalar taratyp, áńgimelep berdi.
Buǵan deıin SQO-da er adam aýyldastaryn aldap, 140 mln teńgeni qaltasyna basqanyn jazǵan edik.
