Elimizde tabıǵat aıasynda demalýǵa qansha aqsha kerek
ASTANA. KAZINFORM – Baǵa qubylyp turǵan kezde tabıǵat aıasyndaǵy demalysty uıymdastyrý úshin bıýdjetti aldyn ala josparlap alǵan durys. Elimizdiń qaı óńirinde demalysty syrtta uıymdastyrý arzanǵa túsedi? Kazinform agenttiginiń tilshisi taza aýada serýendep, tamaqtaný baǵasy qansha bolatynyn anyqtap bildi.
Mamyr aıynyń demalystarynda qazaqstandyqtar tabıǵat aıasynda tynyǵady. Sý aıdyndarynyń, ózenderdiń jaǵasynda káýaptyń ıisi burqyrap, tábetti asha túsedi. Otbasyndaǵy bes jan úshin dastarhan jaıý baǵasy qansha bolady? Orta esepti shyǵaryp kórdik.
Bir otbasyna qajetti qarjy kólimin anyqtaý úshin tabıǵat aıasyna qajetti zattardyń tizimi jasaldy. Biz daıyndaǵan sebetke kiretin káýapqa eki keli sıyr eti, bir keli taýyq eti, bes tandyr nan kiredi. Al kókónister arasynan qııar men qyzanaq baǵasyn salystyrdyq. Sonymen birge bizge bir qap aǵash kómiri qajet.
Baǵany salystyrǵan kezde ádettegiden jańǵylmaǵanymyzdy kórýge bolady. Elimizdiń ońtústiginde nan men kókónis baǵasy tómen bolyp shyqty. Alaıda bárinde birdeı emes. Keıbir kórshiles oblystarda baǵa kúrt kóteriledi. Elimizdiń batysynda taýyq eti men aǵash kómiriniń baǵasy qoljetimdi. Al sıyr eti edáýir joǵary bolyp tur. Soltústik pen ortalyq óńirlerde logıstıkanyń áserinen aǵash kómiri men kókónis baǵasy joǵary. Jalpy tabıǵat aıasynda demalý kezinde óńirler arasyndaǵy aıyrmashylyq keıde 50% jetedi. Másele tek et baǵasynda emes, qosalqy taǵamda bolyp tur.
Baǵa ózgelerge qaraǵanda Almaty qalasynda joǵary. Káýapqa qajetti et baǵasy 5 200 teńgeden bastalyp, som et quny keıde 6 700 teńgege jetedi. Sebepke qajetti ózge zattardyń baǵasy tómen bolǵanymen bir otbasy tabıǵat aıasynda tynyǵýy úshin kem degende 19 525 teńge jumsaıdy.
Elordada sıyr etiniń baǵasy sál arzan. Alaıda Astanada taýyq eti men tandyr nan baǵasy sharyqtap tur. Al ózge zattardyń quny elimizdegi ortasha baǵaǵa saı keledi. Tabıǵat aıasynda jınalǵan kezde shamamen 17 950 teńge qajet bolady.
Kórshiles Kókshetaý qalasynda azyq-túlik baǵasy sál tómen. Astanaǵa qaraǵanda munda aǵash kómiri men kókónis baǵasy ǵana joǵary. Tipti jergilikti qyzanaq baǵasy elimiz boıynsha eń qymbat bolyp shyqty. Demalystyń jalpy shyǵyny – 17 825 teńge.
Jezqazǵan qalasynyń turǵyndary kóktemde tabıǵat aıasyna shyqqan kezde 17 525 teńge shyǵyndaıdy. Bul óńirdiń turǵyndary et satyp alǵanda aqshany mol jumsaıdy. Al kókónis, tandyr nan men aǵash kómirine jumsaıtyn qarjy elimizdegi ortasha baǵaǵa saı kelip tur.
Ońtústik óńirdegi baǵasy joǵary qalalar tizimin Shymkent (16 875 teńge) pen Taraz (16 775 teńge) túıindep tur. Eki keli sıyr eti kem degende 9 000 teńge bolsa, taýyq etiniń baǵasy qoljetimdi. Alaıda kókónis pen aǵash kómiriniń baǵasy tabıǵat aıasyndaǵy demalys shyǵynyn kóbeıtin tur.
Aqtaý, Qaraǵandy men Qonaev qalalarynyń turǵyndar da mamyr aıyndaǵy demalystarda 16 000 teńge shyǵyndaı alady. Aqtaý qalasynda sıyr etiniń baǵasy joǵary, al Qaraǵandy men Qonaevta demalysqa qajetti ózge zattardyń quny kóterilip tur.
Óskemen, Aqtóbe men Qostanaı qalalarynda tabıǵat aıasyndaǵy demalys quny sál tómen. Degenmen munda da qajetti zattardy satyp alýǵa 15 000 teńge jumsaıdy. Aqtóbe qalasynda eki keli sıyr etine shamamen 9 500 teńge qajet, al taýyq eti arzanǵa (orta eseppen 1 350 teńge) túsedi. Sonymen birge bul óńirde qııar men qyzanaq baǵasy da tómen. Qostanaı men Óskemen qalalarynda jalpy shyǵyn taýyq eti men kókónis qunyna qaraı kóterilip tur.
Al Atyraý qalasynda taza aýada tynyǵý úshin kem degende 15 100 teńge qajet. Aqtóbe qalasy sııaqty munda da sıyr etiniń baǵasy joǵary, al tandyr nan men kókónis baǵasy tómen.
Taldyqorǵan, Pavlodar, Semeı men Petropavlda káýap jasaý asa qymbat emes. Munda ettiń baǵasy joǵary emes ári tandyr nan men kókónis baǵasy tómen. Úsh kelilik aǵash kómiriniń baǵasy da elimizdegi ortasha qunǵa qaraǵanda sál tómen. Nátıjesinde otbasylyq demalysty uıymdastyrýǵa 14 425 - 14 990 teńge jumsaýǵa bolady.
Túrkistan qalasynda aǵash kómiriniń baǵasy joǵary, al tandyr nan men et baǵasy tómen. Demalysqa shamamen 14 425 teńge jumsaýǵa bolady. Baǵa Shymkent pen Taraz qalalaryna qaraǵanda arzanǵa túsedi.
Oral qalasynda demalysqa qajetti azyq-túlik baǵasy ózgege qaraǵanda tómen. Jergilikti et baǵasy men taýyq etiniń quny qoljetimdi. Alaıda qııar men qyzanaq baǵasy joǵary. Sondyqtan elimizdegi eń arzan qala bola almady.
Qyzylorda qalasynda mamyr aıyndaǵy meıramdarda tabıǵat aıasynda tynyǵý arzanǵa túsedi. Dál osy qalada sıyr etiniń kelisi 3 200 teńge, al taýyq etiniń baǵasy 1 200 teńge. Sonymen birge tandyr men kókónis quny da tómen. Jalpy bes jannan turatyn bir otbasy qajetti azyq-túlikti 13 175 teńgege satyp alyp, demalysyn sátti ótkizse bolady.
Aıta keteıik, buǵan deıin qııar men qyzanaq baǵasy jazyldy. Sonymen birge tal men kóshet baǵasyn salystyrdyq.
