SQO-da balalarǵa arnalǵan eki ońaltý ortalyǵy ashylady
PETROPAVL. KAZINFORM — Erekshe qajettiligi bar balalarǵa arnalǵan ortalyqtyń bireýi Petropavlda paıdalanýǵa beriledi.
Soltústik Qazaqstan oblystyq ákimdiginiń málimetinshe, nysan Petropavldaǵy burynǵy № 2 korrektsııalyq mektep ǵımaratynda ashylady. Qazirgi ýaqytta munda kúrdeli jóndeý júrgizilip jatyr.
Ortalyq mentaldyq aýytqýy bar balalardy ońaltýǵa tolyq beıimdeledi. Osy maqsatqa 700 mln teńgeden astam qarajat bólindi. Bul jerde ártúrli baǵyttaǵy mamandar jumys istep, balalardy barlyq qajetti terapııa túrlerimen qamtıdy. Jyl saıyn shamamen 500 balaǵa ońaltý qyzmeti kórsetilmek.
— Oblys ortalyǵynda erekshe qajettilikteri bar balalarǵa arnaıy ortalyq ashý máselesi birneshe jyldan beri kóterilip keledi. Ata-analar balalarynyń ózge óńirlerge barmaı-aq, qajetti kómekti ózimizde alýyna múmkindik jasaý týraly ótinish bildirgen bolatyn. Búginde óńirimizde mentaldyq aýytqýy bar 400-ge jaqyn bala turady. Mundaı balalarǵa damýy úshin qolaıly jaǵdaı jasaý qajet. Sondyqtan Petropavlda ortalyq ashylatyn bolady. Bul «Qamqorlyq qory» korporatıvtik qorymen birlesip júzege asyryp jatqan jobamyz. Nátıjesinde ortalyq zamanaýı jabdyqtarmen jáne qajetti jıhazben qamtamasyz etedi, — dedi SQO ákimi Ǵaýez Nurmuhambetov.
Ekinshi ońaltý ortalyǵy Taıynsha aýdanynyń Chkalov aýylynda ashylmaq. Nysan erekshe kútimdi qajet etetin, onyń ishinde tirek-qımyl apparaty buzylǵan balalarǵa arnalady. Bul ortalyq Taıynsha, Aqjar jáne Ýálıhanov aýdandaryndaǵy shamamen 600 balaǵa qyzmet kórsetedi.
Buǵan deıin Almatyda bıyl ashylǵan erte ońaltý ortalyǵy 57 balaǵa kómekteskenin jazǵan edik.