SQO-da avtogaz ben dızel otyny qymbattady
Áleýmettik jelide soltústikqazaqstandyqtar avtokólikke quıatyn gaz baǵasynyń birden shamamen 30 teńgege qymbattaýyna baılanysty narazylyqtaryn bildirip jatyr. Avtokólik ıeleriniń aıtýynsha, onyń ózi keı janar-jaǵarmaı stansalarynda erkin saýdada joq. Kógildir otyn tek talonmen ǵana bosatylyp jatyr. Buǵan deıin óńirde dızel otynynyń da jetispeýshiligi baıqalsa, endi keıbir stansalarda onyń lıtri 315 teńgeden saýdaǵa shyǵaryldy.
SQO energetıka jáne turǵyn úı-kommýnaldyq sharýashylyǵy basqarmasynyń málimetinshe, oblysty gazben qamtıtyn 8 uıym bar. Olardyń bireýi ózderiniń stansalarynda kógildir otynnyń lıtrin 110 teńgeden satyp jatyr.
«SQO-ǵa aı saıyn 5 800 tonna gaz zaýyttardan belgilengen baǵa boıynsha jiberiledi. Qalǵan qajettilikti gazben qamtýshy uıymdar elektrondy alań arqyly erkin baǵaǵa satyp alady. Mine, osylaısha aýktsıon arqyly qymbatqa satyp alǵan bir uıym qazir gazdy óz stansalarynda 110 teńgeden saýdalap jatyr. Qalǵan stansalarda baǵa 85-95 teńge aralyǵynda. Al der kezinde qor jasap almaǵan 4 uıym qazir gazdy tek talonmen ǵana jiberip jatyr. Máseleni sheshý úshin qyrkúıek aıynda Energetıka mınıstrligine hat jazyp, qosymsha 1,5 myń tonna kógildir otyn aldyq. Qazan aıyna taǵy myń tonna surattyq», - deıdi SQO energetıka jáne turǵyn úı-kommýnaldyq sharýashylyǵy basqarmasynyń bólim basshysy Erlan Qaıyrbekov.
