SQO-da aqyn-ánshiler arasynda qazaq kúresinen týrnır ótti
A.Vınokýrov sport saraıynda qazaq kúresinen týrnır sahna maıtalmandary arasynda ótti. Erekshe jobaǵa halyq shyǵarmashylyǵy ortalyǵynyń qyzmetkerleri, Aqan Seri atyndaǵy fılarmonııanyń ánshileri, S.Muqanov atyndaǵy qazaq sazdy-drama teatrynyń akterleri, Petropavl qalalyq mádenıet úıiniń qyzmetkerleri jáne óńirdiń 8 aýdanynan ónerde júrgen 16 adam – 80 men 122 keli salmaq dárejesi aralyǵyndaǵy jigitter qatysty.
«Qazaq kúresin damytýdy, óner men sporttyń egiz ekenin kórsetip, ulttyq qundylyqtarǵa bet burýdy maqsat ettik. Jalpy óner jolynda júrgen jigitterdiń boıynda seksen óner de azshylyq etedi. Búgin qatysyp jatqandardyń bári tek sahnada júrgen, ıaǵnı ánshiler, aqyndar, sondaı-aq aýdandaǵy mádenıet úıiniń qyzmetkerleri. Endi arnaıy júlde tigip otyrmyz. Arnaıy júlde - altynmen aptalyp, kúmispen kúptelgen beldik Shymkentte arnaıy tapsyryspen jasaldy. Sonymen birge aqshalaı syılyqtar jáne dıplomdar bar. Bul týrnır kelesi jyly da jalǵasyn tabady dep oılaımyn», - deıdi týrnırdi uıymdastyrýshy, aıtysker aqyn Jarqyn Juparhan.
Jekpe-jekte qazaq kúresiniń barlyq erejeleri eskerildi.
«Bozkilemge alǵashqy jupta shyqtym. Qarsylasymdy jambasqa salyp taza jeńdim. Týrnırdiń aldynda kúrestiń erejelerin eske túsirip, jattyǵýǵa týra keldi. Shyn máninde kóptegen óńirde osyndaı «Óner barysy» ne basqa da saıystar ótip jatady. Bul bizde alǵash ótip jatyr, dástúrli bolsa eken degen tilegim bar», - deıdi oblystyq halyq shyǵarmashylyǵynyń ortalyǵynyń qyzmetkeri, ánshi, júrgizýshi, «Jańajol qyrany» laqap atymen shyqqan balýan Tımýr Seıitjan.
Eki saǵatqa sozylǵan týrnırdiń jeńimpazy bolyp jaýyryny jer ıiskemegen Dáýlet Qurmash tanyldy. Aıyrtaý aýdanynan kelgen aıtysker aqyn Erik Asqarov atyndaǵy aqyndar mektebiniń shákirti, oblystyq, respýblıkalyq aıtys, jyr músháıralarynyń júldegeri. Oǵan altyn beldik jáne 300 myń teńge syıaqy buıyrdy. Júldeli ekinshi-úshinshi oryndy Aıyrtaý aýdany men Aqjar aýdanynan kelgen Erkin Nurbahtınov pen Nurqasym Hasenov ıelendi.
