SQO-da 9 adam koronavırýs juqtyrdy, bireýi bala

PETROPAVL. KAZINFORM – Soltústik Qazaqstan oblysynda koronavırýs ınfektsııasyn juqtyrǵandar sany kóbeıip, 9 adamǵa jetti.

Óńirlik kommýnıkatsııalar qyzmetiniń alańynda SQO sanıtarııalyq-epıdemıologııalyq baqylaý departamentiniń basshysy Áset Jumataev juqpaly aýrýlar boıynsha epıdemıologııalyq jaǵdaıǵa toqtaldy.

Bıyl ótken jyldyń osy kezeńimen salystyrǵanda jedel respıratorlyq vırýstyq ınfektsııany juqtyrǵandar 2,4 ese artyp, 20 666 adam aýyrǵan. Syrqattanǵandardyń 55% - Petropavl turǵyndary.

«Tumaý qańtar aıynan bastap keń tarala bastady. A tıpti H3N2 tumaýyn byltyr qańtarda 18 adam juqtyrsa, bıyl 44 adam aýyrǵan. Syrqattanǵandardyń 36% nemese 16 jaǵdaıda 14 jasqa deıingi balalar juqtyrǵan. Koronavırýs ınfektsııasyn juqtyrýdyń 9 jaǵdaıy tirkeldi. Byltyrǵymen salystyrǵanda 5,4 ese az, degenmen aýyrǵandar sany artyp keledi. 14 jasqa deıingi bir balaǵa «koronavırýs» dıagnozy qoıyldy. Barlyǵynda aýrýdyń belgileri boldy», - deıdi Áset Jumataev.

Departament basshysy juqpaly aýrýlardan saqtaný úshin maska kııý qajettigin eske saldy.

«Aýa arqyly beriletin ınfektsııalyq aýrýlardyń ósýine baılanysty Bas memlekettik sanıtarlyq dárigerdiń 2024 jylǵy 8 aqpandaǵy qaýlysyna sáıkes medıtsınalyq mekemelerde maska kıip, antıseptık qoldaný qajet. Al halyq kóp shoǵyrlanǵan oryndarda – áýejaılarda, temirjol, avto vokzaldarda, bazarlarda, saýda ortalyqtarynda, teatr, kınoteatrlarda, bankter men HQKO, barlyq qoǵamdyq kólik túrlerinde maska taǵý usynylady.

Al aýyrǵan jaǵdaıda úıden shyqpaı, dárigerdi shaqyrǵan jón.

Juqpaly aýrýlardyń aldyn alý úshin daladan kelgen saıyn qoldy sabyndap jýý kerek. Bólmeni jeldetip, jıi jýyp, ylǵaldandyrýdy umytpaý kerek.

Sondaı-aq S dárýmeni bar jemis-jıdekti kóbirek tamaqqa qoldanyp, salamatty ómir saltyn ustanýǵa keńes beremin», - deıdi Áset Jumataev.