SQO-da 450 qoqys polıgonynyń tek 11-inde ǵana qujat bar

PETROPAVL. KAZINFORM – Petropavldaǵy turmystyq qatty qaldyqtardy tógetin polıgonnyń paıdalaný merzimi kelesi jyly aıaqtalady. Qazirgi ýaqytta nysan 94% tolǵan. 

Óńirlik kommýnıkatsııalar qyzmetiniń alańynda ótken brıfıngte qorshaǵan ortaǵa eń kóp áser etetin kásiporyndardyń jaǵdaıy aıtyldy.

«Qyzyljar Tazalyq» JShS ekology Tatıana Kovtýnnyń aıtýynsha, 2018 jyly Petropavldaǵy qatty turmysıyq qaldyqtar polıgony «Qyzyljar Tazalyq» JShS qaramaǵyna ótti. Memlekettiń jarǵylyq kapıtaldaǵy úlesi - 49%.

Qazir nysanda qoqys suryptaý kesheni bar, plastık, qaǵaz jáne karton, shyny, aǵash sııaqty qatty turmystyq qaldyqtar suryptalyp, shart boıynsha kásiporyndarǵa jiberiledi.

«Petropavldan kúnine orta eseppen 150 tonna qoqys shyǵarylady. Mundaǵy máseleniń biri - qaldyqtardyń ózdiginen jıi janýy. Qorshaǵan ortaǵa teris áserdi azaıtý úshin sý, aýa, topyraq jáne ósimdik jamylǵysynyń synamalary alynyp, óndiristik monıtorıng júrgiziledi. 2023 jylǵa berilgen lastaýshy zattar shyǵaryndylarynyń lımıti 2627,5 tonna bolsa, is júzinde atmosferalyq aýaǵa 2281,5 tonna shyǵaryldy.

Polıgonnyń paıdalaný merzimi kelesi jyly aıaqtalady. Jobalyq qýatyn tolyq paıdalanyp, mundaǵy qoqys shamamen 1,5 mln tonnaǵa jetpek. Jospar boıynsha rekýltıvatsııa júrgiziledi», - deıdi Tatıana Kovtýn.

SQO boıynsha ekologııa departamentiniń memlekettik ekologııalyq baqylaý bóliminiń basshysy Ashat Mapenovtyń aıtýynsha, búginde SQO-da qaldyq tógetin 450 polıgon bar. Alaıda solardyń tek 11-iniń ǵana tıisti ruqsat berý qujattary bar.

«QR Úkimeti Qazaqstan Respýblıkasy qaýipsizdik keńesi otyrysynyń hattamasyna sáıkes, turmystyq qatty qaldyqtardyń jańa polıgondaryn salý jáne jumys istep turǵandarynyń qýatyn keńeıtý, sonymen qatar olardy ekologııalyq jáne sanıtarlyq normalarǵa sáıkes keltirý jóninde is-sharalar jospary ázirlendi. Osy josparda «Qyzyljar Tazalyq» JShS polıgonyn rekýltıvatsııalaý boıynsha is-shara kózdelgen, bul jumys 2026 jylǵa josparlanǵan.

Polıgonda qaldyqtardyń órtenýi jıi tirkeletinin atap ótken jón. Máselen, osy jyldyń ótken kezeńinde Petropavl qalasynyń tótenshe jaǵdaılar basqarmasy materıaldaryna sáıkes qaldyqtar eki ret órtendi. Ekologııa departamenti júrgizgen jospardan tys tekserý nátıjeleri boıynsha «Qyzyljar Tazalyq» JShS ekologııalyq talaptardy buzǵany úshin ákimshilik jaýapkershilikke tartyldy, zań buzýshylyqty joıý týraly nusqama berilip, nusqama oryndaldy», - deıdi Ashat Mapenov.

Aqtóbede «Taza Qazaqstan» baǵdarlamasy aıasynda «Eskertkish – el tarıhy» aktsııasy ótkenin jazǵan edik.