SQO-da 3 jasqa deıingi balalardy ońaltý ortalyǵy ashylady

PETROPAVL. KAZINFORM — Soltústik Qazaqstan perınataldy ortalyq janynan 3 jasqa deıingi balalardy ońaltýǵa arnalǵan ortalyq ashylady.

Bul týraly oblystyq perınataldyq ortalyqtyń jumysymen tanysqan óńir basshysy Ǵaýez Nurmuhambetov aıtty.

Erte aralasý ortalyǵy dep atalatyn bul mekeme búginde qoldanysqa berýge daıyn tur.

Munda ortalyq júıke júıesiniń týabitken aqaýlary, sondaı-aq tirek-qımyl apparatynyń zaqymdanýy bar, merziminen buryn týǵan 3 jasqa deıingi balalar sońǵy tehnologııalardy qoldaný arqyly ońaltýdan ótedi.

Ortalyqta jatyp emdelýge 15 oryn bar. Kúndizgi statsıonarda jyl saıyn 360 bala ońaltýdan ótedi. 

«Ortalyqty kúrdeli jóndeýden ótkizýge bıýdjetten qarjy bólindi, al „Samuryq-Qazyna“ AQ, „Qazaqstan halqy“ jáne „Qamqorlyq“ qorlarynyń qoldaýymen qajetti qural-jabdyqtar alyndy. Ár balanyń jeke jospary bolady. Kómekti nevropatolog, reabılıtolog, pedıatr, nevrolog, ergoterapevt, psıholog, emdik dene shynyqtyrý nusqaýshylary, defektolog men logoped mamandary kórsetedi. Sonymen qatar, „Qamqorlyq“ bastamasy aıasynda oblystyq balalar aýrýhanasynda ońaltý ortalyǵyn jańǵyrtý josparlanǵan. Jobany júzege asyrý erekshe qajettilikteri bar balalardy qoǵamǵa beıimdeýge jáne ońaltý qyzmetteriniń qoljetimdiligin ulǵaıtýǵa múmkindik beredi», — dedi Ǵaýez Nurmuhambetov.

SQO densaýlyq saqtaý basqarmasynyń málimetinshe, balalardy ońaltý ortalyǵy taıynsha aýdanynda da ashylmaq.

Qazir «Qamqorlyq» qorymen birge eskızdik jobasy ázirlenip jatyr.