SQO-da 23 myńnan astam áıel pregravıdaldy daıyndyqtan ótedi
PETROPAVL. KAZINFORM – Soltústik Qazaqstan oblysynda «Analar saýlyǵy» baǵdarlamasy aıasynda birqatar is-shara qolǵa alyndy.
2025 jyldan bastap Qazaqstanda jasóspirimderdiń reprodýktıvti densaýlyǵyn saqtaý jáne 15 pen 49 jas aralyǵyndaǵy áıelderdiń densaýlyǵyn nyǵaıtý maqsatynda «Analar saýlyǵy» baǵdarlamasy júzege asyryla bastady. «Áleýmettik medıtsınalyq saqtandyrý qory» KEAQ SQO fılıaly dırektory Aınagúl Dáýletshınanyń aıtýynsha, qaýipsiz júktilikti qamtamasyz etý úshin saýyqtyrý sharalary júktilik bastalǵanǵa deıin pregravıdaldy daıyndyq túrinde júrgiziledi.
— Pregravıdaldy daıyndyq — bul áıeldi júktilikke daıyndaý protsesi. Ol bolashaq ana men balanyń densaýlyǵyn baqylaýǵa, nazarda ustaýǵa baǵyttalǵan birqatar is-sharadan turady. Kórsetiletin qyzmetterdiń tizbesi Qazaqstan Respýblıkasynda akýsherlik-gınekologııalyq kómek kórsetýdi uıymdastyrý standartyna sáıkes aıqyndalǵan. Ýchaskelik dárigerler ana men bala úshin júktilik pen bosaný nátıjelerin jaqsartý maqsatynda josparlanǵan júktilikten 6 aı buryn árbir turǵyndy tekseredi. Qyzdar men jasóspirimderge de erekshe nazar aýdarylady, — deıdi fılıal dırektory.
Mamannyń aıtýynsha, reprodýktıvti jastaǵy áıelder MÁMS arqyly konsýltatsııalyq-dıagnostıkalyq kómek alady, olar: akýsher-gınekologtyń keńesi, kórsetilimder boıynsha genetıkaǵa jáne V jáne S gepatıtine tekserilý.
— Pregravıdaldy daıyndyq júkti áıeldiń ómiri men uryqqa tónetin qaýip-qaterdi aldyn alý úshin qajet. Ómirge deni saý bala ákelý úshin áıel densaýlyǵyna mán berýi qajet. Jalpy jubaılardyń jaman ádetterden bas tartýy, ómir saltyn ózgertip, dene salmaǵyn qalypqa keltirý. Sondaı-aq dárigerdiń qatysýymen jynystyq gormondardyń deńgeıin túzetý, dárýmender men makro jáne mıkroelementterdiń jetispeýshiligin joıý, bar aýrýlardy emdeý de aldyn ala daıyndyqqa jatady. Osyǵan baılanysty júktilikti josparlaý aldynda emhanada tekserýden ótýge shaqyramyz, — deıdi Aınagúl Dáýletshına.
«Áleýmettik medıtsınalyq saqtandyrý qory» KEAQ SQO fılıalynyń málimetinshe, óńirde 117 myńǵa jýyq reprodýktıvti jastaǵy áıel bar. Bıyl solardyń 23 375-in qamtý úshin 134 mln teńge qarajat bólindi.
Buǵan deıin SQO-da turǵyndardyń 90 myńǵa jýyǵy saqtandyrylmaǵanyn jazǵan edik.