Sırııadan oralǵan áıeldiń áńgimesi

ALMATY. QazAqparat - Elimizde halqymyzdyń dinı saýatty bolýy, qoǵamda dinı alaýyzdyq bolmaýy óte mańyzdy bolyp turǵan jaǵdaıda «Qazaqstan Respýblıkasynyń dinı ekstremızm men terrorızmge qarsy is-qımyl jónindegi 2018-2022 jylǵa arnalǵan memlekettik baǵdarlamasy» qabyldandy. Osy baǵdarlama aıasynda Respýblıkamyzda aqparattyq-túsindirý toby memlekette dinı ekstremızmdi boldyrmaýǵa jáne halyqtyń dinı saýattylyǵyn arttyrý maqsatynda halyqpen jumys jasap jatyr.

Men Almaty qalalyq Qoǵamdyq damý basqarmasynyń «Monıtorıng jáne taldaý» ortalyǵynyń aqparattyq-túsindirý tobynyń múshesi retinde, halyqpen jumys jasaý barysynda baıqaǵanym sońǵy 2-3 jylda destrýktıvti dinı aǵymdardyń jetegine ketken azamattarymyzdyń sany azaıǵan.

Alaıda, qaqtyǵys aımaǵynan oralǵan jerlesterimizben ońaltý jumysyn mindetti túrde júrgizý qajet. Olar ol jaqta sumdyq kórinisterdiń kýási boldy. Bul kez kelgen adamnyń psıhologııasyna áser etetini anyq. Ásirese, qyz-kelinshekter mamandardyń kómegine zárý. Sırııadan qaıtyp kelgen áıelderdiń taǵdyry ártúrli.

Almatylyq 24 jastaǵy dúngen qyzy 2-3 jasynda ata-anasy ajyrasyp, ol anasynyń tárbıesinde ósken, óte bilimdi. Anasy eýropalyq musylman azamatyna turmysqa shyǵyp, ol joǵary synypty Eýropanyń damyǵan elderindegi kolledjderde jalǵastyrýyna týra kelgen. Birneshe til meńgerip te úlgeredi. Alaıda eýropalyq ómir saltynan ol qoǵamǵa etene aralasa almaı, ǵalamtorǵa jıi telmirgen. Jastar jıi otyratyn áleýmettik jelilerden bir dinı topqa kirip, aıat-hadıster oqyp, sol topta daǵystandyq sheshen jigitimen tanysyp, jaqyn sóılese bastaıdy. Jergilikti meshitke baryp, namaz úırenip, hıdjap kıip, bas-aıaǵy 2 aıda «vırtýaldy ǵashyǵy» oǵan turmysqa shyǵýǵa usynys jasaǵan. Jyly sózdi úıip-tókken sheshen jigitine es-tússiz ǵashyq bolǵan taldyrmash kelgen dúngen qyz eshkimge aıtpastan ushaqqa bılet alyp, Sırııadan biraq shyǵady. Nekelesip, «baqytty» otbasylyq ǵumyr súre bastaǵan ol Sham ólkesindegi joıqyn soǵysqa, esh nársege asa mán de bermegen. Ol kúıeýiniń janynda bolǵanyn qalaǵany sonsha, «ǵashyǵynyń» kezekti jarylysta aıaǵynan aırylǵanyna qýanǵanyn jasyrmady. «Qansha ret «elge oralaıyq» desem de, ol jaı fantastıkalyq áńgime bolyp qala berdi. Sebebi kúıeýim Reseı azamaty bolǵandyqtan, onyń aldynda ne kútip turǵanyn oılaýdyń ózi qorqynyshty edi. Sondyqtan halıfat bergen azyn-aýlaq aqshamen kún kóre berdik» degen ol, osy jyl basynda kezekti jarylys kezinde kóz jumǵan kúıeýin esine alyp egile berdi. «Qazaqstan azamattaryn alyp ketedi» degendi estigende úsh balamdy jetektep, oılanbastan alǵa umtyldym» deıdi ol kóz jasyn súrtip.

Eger sol 5 jyl burynǵy ǵumyryńyzdy qaıta súrýge múmkindik bolsa, siz Sırııaǵa barar ma edińiz? - degen saýalyma dúngen qyzy tosylyp, jaýap bere almaı qaldy. Sebebi ol 5 jyl otasqan reseılik sheshen azamatynyń adamgershiligin jıi aýyzǵa alyp, biraq onyń dinı saýatsyzdyqtan arandap qalǵanyn aıta berdi.

Jalpy, búginde elimizdegi dinı ahýal turaqty ekenin jáne azamattardyń dinı saladaǵy quqyqtaryn iske asyrýy úshin memleket tarapynan qajetti jaǵdaılardyń jasalyp jatqanyn aıtýymyz kerek. Búgin bizge ata dinimizdi, ulttyq qasıetimizdi, ádet-ǵurypymyz ben salt-dástúrimizdi qaıta túletip, bárin tolyq qalpyna keltirýge tamasha múmkindik berilip otyr. Qazaqstannyń ómirinde dinniń alatyn orny men róli mańyzdy ári erekshe.

Aısha Keńesbaı, dintanýshy-jýrnalıst