Sırııadaǵy daǵdarysty áskerı kúshpen sheshý múmkin emes - E. Ydyrysov

ASTANA. QazAqparat - Qazaqstan Sırııadaǵy daǵdarystyń áskerı kúshpen sheshilmeıtindigine barsha álemdik qoǵamdastyqtyń nazaryn aýdarady. Bul týraly búgin elordada sırııalyq oppozıtsııa ókilderiniń kelissózderi qorytyndysy boıynsha baspasóz máslıhatynda QR Syrtqy ister mınıstri Erlan Ydyrysov málim etti.

«Qazaqstannyń paıymynsha, sırııalyq daǵdarys áskerı kúshpen sheshilýi múmkin emes. Bul ahýaldyń tek beıbit, balama sheshimi ǵana bar»,-dedi mınıstr.

Osy oraıda ol bul daǵdarystyń aınalasynda óte kóp kúshter shoǵyrlanǵanyn, ıaǵnı Sırııanyń óziniń ishki kúshteri jáne syrtqy múddeler is-qımyldar jasap jatqandyǵyn málim etti.

«Osy daǵdarystyń aınalasynda óńirlik jáne jahandyq oıynshylardyń óte kóp kúshteri jınalǵan. Sondyqtan da birinshi kezekte kelissózder jolymen sırııalyqtardyń ózderi beıbit sheshimdi jasaýy kerek dep sanaımyz. Olar elderiniń beıbit, uzaqmerzimdi damýyn qamtamasyz etýi úshin kelisimge kelýi aıryqsha mańyzdy»,-dedi E. Ydyrysov.

Esterińizge sala keteıik, osy aptanyń basynda Astanada sırııalyq oppozıtsııa ókilderiniń kelissózderi bastaldy.Osyǵan deıin Sırııanyń oppozıtsııalyq kúshter toby Qazaqstanǵa óz elderindegi daǵdarysty retteý máselesi boıynsha kelissózderde ara aǵaıyndyq jasaý týraly ótinishin bildirgeni belgili.