Sırııa jańa valıýtasyn aınalymǵa engizedi

ASTANA. KAZINFORM — Sırııa Ortalyq bankiniń tóraǵasy Abdýlkadır ál-Hasrııa jańa sırııalyq valıýtanyń shyǵarylatynyn málimdedi. Bul týraly Anadolu habarlady.

Áleýmettik jelidegi jazbasynda Sırııa Ortalyq bankiniń basshysy ál-Hasrııa jańa valıýtany aınalymǵa engizý týraly jarlyqtyń jarııalanǵanyn aıtty.

Ál-Hasrııanyń aıtýynsha, jańa valıýta — jańa ekonomıkalyq jáne valıýtalyq kezeńniń bastalýyn aıqyndaıtyn mańyzdy ulttyq oqıǵa.

— Jańa sırııalyq valıýta azat etilgennen keıingi qarjylyq táýelsizdigimizdiń sımvoly sanalady jáne Sırııa Ortalyq bankiniń basshylyǵymen barlyǵynyń yntymaqtastyǵy negizinde qurylǵan jańa kezeńniń bastalǵanyn bildiredi. Bul — azat etilgennen keıin qol jetkizilgen jetistikterge qosylatyn ulttyq tabys ári turaqtylyq pen ekonomıkalyq qalpyna kelý jolyndaǵy nyq qadam, — dep atap ótti Sırııa Ortalyq bankiniń tóraǵasy.

Onyń aıtýynsha, jańa valıýtaǵa qatysty tolyq málimetter 28 jeltoqsanda ótetin otyrysta jarııalanady.

Aıta keteıik, Sırııa 14 jyldan keıin Jerorta teńizi odaǵyna oralǵanyn jazdyq.

Sondaı-aq el halqy Asad rejıminiń qulaǵanyna bir jyl tolǵanyn atap ótti.