Sıngapýrlyq basylym: DeepSeek-ti paıdalanýǵa tyıym salǵandardyń qatary ósip keledi
ASTANA.KAZINFORM – Japonııanyń Toyota, Mitsubishi jáne SoftBank bastaǵan kompanııalary men Ońtústik Koreıanyń Seýl Ulttyq ýnıversıteti qytaılyq generatıvti jasandy ıntellekt ónimi – DeepSeek-ti paıdalanýǵa tıym saldy. Bul týraly sıngapýrlyq «Lianhe Zaobao» basylymy habarlady.
Basylymnyń jazýynsha, tıisti aqparattar men derekterdiń Qytaı úkimetine qoldy bolý qaýpine baılanysty DeepSeek-ti paıdalanýǵa tyıym salǵan japonııalyq kompanııalardyń sany kóbeıip keledi.
— Aqparattyq qaýipsizdik turǵysynan alańdaýshylyq týdyrǵandyqtan (qyzmetkerlerimizdiń) paıdalanýyna tyıym saldyq, - dep túsindirdi Toyota ókili.
Al Mitsubishi kompanııasy qyzmetkerler tarapynan jumysta DeepSeek-ti paıdalaný týraly ótinish túskenin, biraq qazirshe oǵan ruqsat etpeıtinin málimdedi.
SoftBank te kompanııa ishinde DeepSeek-ke shekteý qoıyp, ony operatorlyq termınaldarǵa júkteýge tyıym saldy.
Sondaı-aq Seýl ulttyq ýnıversıteti de DeepSeek-ti buǵattaý týraly sheshim shyǵardy. Sheshimge sáıkes, ýnıversıtettiń Aqparattandyrý basqarmasy beısenbi kúni (13 aqpan) tańǵy saǵat 9-dan bastap kampýs aýmaǵynda symdy jeli arqyly DeepSeek platformasyna qosylýǵa tyıym saldy.
Basqarmanyń málimetinshe, jeke derekterdi qorǵaý sekildi qaýipsizdik sharalarynyń senimdiligi rastalǵanǵa deıin DeepSeek-ti paıdalanýǵa ýaqytsha shekteý qoıylady. Eger akademııalyq zertteý nemese bilim berý maqsatynda osy platformany paıdalanýǵa qajettilik týyndasa, aldyn ala ruqsat alý qajet.
Basylymnyń atap kórsetýinshe, DeepSeek naryqqa engeli birqatar el men aımaqta ony paıdalanýǵa shekteý qoıatyn sharalar qabyldandy. Italııa bıligi 30 qańtarda jeke derekterdiń qaýipsizdigine baılanysty DeepSeek-ti buǵattap tastady. Taıvannyń «Tsıfrlyq damý mınıstrligi» 31 qańtardan bastap memlekettik organdar men mańyzdy ınfraqurylymdarda DeepSeek-ti paıdalanýǵa tyıym salynǵanyn málimdedi.
Aýstralııa 4 aqpan kúni ulttyq qaýipsizdikke baılanysty úkimettik qurylǵylarda DeepSeek qyzmetin paıdalanýǵa tyıym saldy. Ońtústik Koreıanyń birqatar memlekettik organy 5 aqpannan keıin DeepSeek-ti buǵattaı bastady.
Eske sala keteıik, buǵan deıin qańtar aıynda jaryqqa shyqqan qytaılyq DeepSeek startapynyń jańa ázirlemesi JI naryǵyn dúr silkindirgenin jazǵan edik. Qosymsha iske qosylysymen sanaýly saǵattarda App Store-daǵy eń kóp júktelgen tegin baǵdarlamalardyń TOP-5 tizimine engen.