Shymkentte shekteý sharalary jeńildetildi

ShYMKENT. QazAqparat – Shymkent qalasynyń aýmaǵynda koronavırýstyq ınfektsııanyń taralýyn aldyn alý boıynsha shekteý sharalaryn jeńildetý týraly Shymkent qalasynyń Bas memlekettik sanıtarııalyq dárigeriniń jańa qaýlysy shyqty, dep habarlaıdy QazAqparat tilshisi.

Qaýlyǵa sáıkes turǵyndar men qonaqtar 5 jasqa deıingi balalardy qospaǵanda, sondaı-aq qoǵamdyq tamaqtaný oryndarynda tamaq ishý jáne ashyq aýada bolǵan jaǵdaılaryn eseptemegende halyqtyń kelýine, qyzmet kórsetýine jáne demalýyna arnalǵan úı-jaılarda, qoǵamdyq kólikte betperde kııý rejımin saqtaý qajet.

Adamdardyń aıaldamalarda jáne qoǵamdyq kólikterde shoǵyrlanýyn boldyrmaý maqsatynda qarbalas sátte jelide kólik quraldarynyń (avtobýstardyń, shaǵyn avtobýstardyń) sany kóbeıtilip, qalǵan ýaqytta qozǵalystyń birkelki kestesi uıymdastyrylýy tıis.

Shymkent qalasynyń aýmaǵynda, móltek aýdandardyń, turǵyn úı alaptarynyń, kóp qabatty turǵyn úılerdiń, uıymdardyń aýmaǵynda jáne qoqysqa arnalǵan alańshalary josparly túrde únemi tazartylyp otyrýy qajet.

Barlyq nysandarda, onyń ishinde qoǵamdyq kólikte, taksıde sanıtarııalyq-profılaktıkalyq, sanıtarııalyq-epıdemııaǵa qarsy jáne dezınfektsııalyq is-sharalardy júrgizý qamtamasyz etilýi tıis.