Shymkentte kovorkıng ortalyǵy ashyldy
Taıaýda ǵana respýblıkalyq mańyzy bar qalalardyń qataryna qosylǵan shaharda partııanyń budan da basqa tyń bastamalary sátti júzege asyrylýda. Soǵan oraı partııa Tóraǵasynyń birinshi orynbasary Máýlen Áshimbaev elimizdiń úshinshi megapolısine arnaıy baryp, atalǵan baǵyttaǵy jumystarmen tanysty. Sondaı-aq ol partııanyń Shymkent qalalyq fılıalynyń konferentsııasyna qatysty. Onda fılıal tóraǵasy saılandy.
Sapar barysynda Máýlen Áshimbaev shahar basshysy Ǵabıdolla Ábdirahymovpen birge «Otyrar» óńirlik ámbebap ǵylymı kitaphanasynda ashylǵan kovorkıng-ortalyqqa bardy. Atalǵan ortalyq jańa tehnologııamen jáne joǵary jyldamdyqty ınternetpen jabdyqtalǵan. Munda kelýshiler arnaıy konferents-zalda túrli taqyryptarda semınarlar, dárister jáne trenıngter ótkize alady. Odan bólek, jańa ortalyqta demalys aımaǵy, kıno zaly, kofehana, kitap dúkeni jáne erkin pikirtalas aımaǵy bar. Osylaısha dástúrli kitaphanadan jańa zaman talaptaryna saı naǵyz bilim ortalyǵy retinde qaıta jańǵyrǵan nysan qazirdiń ózinde jergilikti jastardyń jıi bas qosatyn jerine aınalyp úlgerdi.
Osyndaı kovorkıng-ortalyqtar jastarǵa berilip otyrǵan úlken múmkindik ekenin aıtqan Máýlen Áshimbaev ony jastar, sonyń ishinde «Jas Otan» jastar qanatynyń músheleri tıimdi paıdalanýy kerektigin tilge tıek etti.
«Elbasynyń «Rýhanı jańǵyrý» baǵdarlamasynyń negizgi baǵyttarynyń biri - halyqtyń bilimge degen qushtarlyǵyn arttyrý. Osyǵan oraı «Nur Otan» partııasy elimizdegi kitaphanalardyń qyzmetin jańǵyrtyp, olardy jańa zamanǵa saı kovorkıng-ortalyq retinde qaıta qurý jobasyn qolǵa aldy. Sebebi, kitaphanalar tek kitap oqıtyn oryn emes, túrli semınarlar, trenıngter, dárister ótetin, jastar jıi bas qosatyn naǵyz bilim ortalyǵy bolýy tıis. Sondyqtan osyndaı ortalyqtardy mazmundy, mándi dúnıelermen toltyrýymyz kerek. Jobanyń negizgi maǵynasy da osy, ıaǵnı dástúrli kitaphanalarǵa jastardy tartyp, olardyń kitap oqýǵa, sapaly bilim alýyna jaǵdaı jasaý», - dedi Máýlen Áshimbaev.
Taǵy bir partııalyq joba aıasynda qalada kitap qoryn elektrondy nusqaǵa kóshirý jumystary qarqyndy júrgizilýde. Tek bir ǵana «Otyrar» kitaphanasynyń ózinde 380 myńnan astam túrli oqýlyqtar bar. Olardyń ishinde tarıhtan syr shertetin qundy dúnıeler de kezdesedi.
Óz sózinde «Nur Otan» partııasy Tóraǵasynyń birinshi orynbasary Elbasynyń Shymkentke jańa mártebe bergen tarıhı sheshimi qalanyń áleýmettik ınfraqurylymyn jańǵyrtyp, turǵyndardyń ómir súrý sapasyn jaqsartýǵa jáne tutas óńirdiń damýyna tyń serpin bergenin aıtty. Osylaısha, Memleket basshysy barsha shymkenttikterge zor senim artyp, aldaǵy ýaqytta qalanyń elimizben qatar Ortalyq Azııadaǵy ınnovatsııalar men ınvestıtsııalar ortalyǵy bolýyna dańǵyl jol ashyp bergenine nazar aýdarǵan Máýlen Áshimbaev mıllıon turǵyny bar qalada jańashyldyqqa jeteleıtin osyndaı oryndardyń kóp bolýy kerektigin atap ótti.
Sonymen qatar, partııa Tóraǵasynyń birinshi orynbasary M.Áýezov atyndaǵy Ońtústik-Qazaqstan memlekettik ýnıversıtetinde «Nur Otannyń» bastamasymen ashylǵan ІT-ortalyqqa bardy. Partııalyq joba boıynsha bul ortalyqta óńirdegi ınformatıka pániniń muǵalimderi baǵdarlamalaý, robot tehnıkalary jáne 3D modeldeý negizderin úırenýde. Jyl saıyn munda 40 mamandy oqytyp, biliktiligin arttyrý kózdelip otyr. Sonyń nátıjesinde 2020 jylǵa deıin 120 azamat bilimin jetildirmek.
Partııa Tóraǵasynyń Birinshi orynbasary osyndaı ortalyqtar men tegin ІT-synyptar jobasy «aqyldy ekonomıka» úshin mamandar daıarlaýǵa baǵyttalǵanyn aıtty. Osy rette ІT-synyptardyń elimiz boıynsha kóptep ashylyp, jastardyń tsıfrlyq tehnologııa, programmalaý jáne robot tehnıkalary sııaqty suranysqa ıe salany meńgerýine jumys istep jatqanyn atap ótken jón. Shymkent qalasyndaǵy Ońtústik Qazaqstan memlekettik pedagogıkalyq ýnıversıtetinde de birqatar ІT-synyp ashylyp, mektep oqýshylaryn oqytý isi bastalyp ketti. Nátıjesinde aldaǵy eki jyldyń ishinde shaharda 23500-ge jýyq bala ІT-tehnologııanyń qyr-syryn meńgerip shyqpaq.
«Partııa memlekettik organdarmen, úkimettik emes uıymdarmen jáne bıznes qaýymdastyqpen birlesip, elimiz boıynsha 1000 tegin ІT-synyp ashýdy josparlap otyr. Onda 150 myń bala tsıfrlyq tehnologııa boıynsha bilim alady. Bul Qazaqstan úshin tsıfrlandyrý isindegi mańyzdy qadam ekeni sózsiz. Qazirgi tańda osy salada bilikti mamandardyń jetispeıtini de belgili. Partııa osyndaı jobalar arqyly atalǵan olqylyqtardyń aldyn alýǵa óz úlesin qosady», - dedi Máýlen Áshimbaev.
Sondaı-aq partııa Tóraǵasynyń Birinshi orynbasary «Rýhanı jańǵyrý» baǵdarlamasy jáne bıznestiń áleýmettik jaýapkershiligi aıasynda salynǵan múmkindigi shekteýli balalarǵa arnalǵan «Áıgerim» arnaýly korrektsııalyq balabaqshasyna bardy. Mekeme ujymymen jáne ata-analarmen kezdesýinde Máýlen Áshimbaev partııanyń bul salany únemi basty nazarda ustaıtynyna jáne qamkóńil jandardyń ómir súrý sapasyn jaqsartýǵa arnalǵan «Kedergisiz keleshek» partııalyq jobasynyń jumysyna toqtalyp ótti.
Sapar sońynda partııa Tóraǵasynyń Birinshi orynbasary «Nur Otan» partııasynyń Shymkent qalalyq fılıalynyń konferentsııasyna qatysty. Munda partııa qyzmetin jańǵyrtý, Elbasy aıqyndap bergen basym baǵyttardy júzege asyrý jáne Prezıdenttiń bes áleýmettik bastamasynyń iske asyrylýyna qoǵamdyq baqylaý júrgizý jumystary jan-jaqty talqylandy. Nátıjesinde atalǵan baǵyttar boıynsha naqty tapsyrmalar berilip, aldaǵy jumys baǵyty pysyqtaldy. Odan bólek, konferentsııada partııa qalalyq fılıalynyń tóraǵasy bolyp Shymkent ákimi Ǵabıdolla Ábdirahymov saılandy.
