Shveıtsarııada Ýkraına boıynsha kelissóz aıaqtaldy

ASTANA. KAZINFORM – Memlekettik hatshy Marko Rýbıo Jenevadan ketip, Ýkraınanyń beıbitshilik jospary boıynsha joǵary deńgeıdegi kezdesýlerden keıin Vashıngtonǵa oraldy, dep habarlaıdy BBC.

Rýbıo tehnıkalyq talqylaýlar jalǵasatynyn aıtyp, «biz maqsatymyzǵa óte qolaıly merzimde, óte jaqyn arada jetemiz» degen pikir bildirdi.

BBC-diń jazýynsha, basqa AQSh sheneýnikteriniń Jenevadan ketkeni belgisiz, degenmen Rýbıo buǵan deıin amerıkalyq taraptyń «barlyq deńgeıdegi mamandary osy jumyspen tolyq aınalysyp jatqanyn» málimdegen.

Jeksenbi kúni Jenevada ótken kelissózderden keıin Rýbıo Ýkraına sheneýnikterimen soǵysty toqtatý josparyn talqylaýda «aıtarlyqtaı ilgerileýshilik» bolǵanyn málimdedi. Memlekettik hatshynyń aıtýynsha, bul Donald Tramp ákimshiliginiń qańtarda bastalǵannan bergi Ýkraına tarapymen bolǵan eń nátıjeli kezdesýi boldy.

Qorytyndy kelisim Tramp pen Ýkraına prezıdenti Vladımır Zelenskııdiń maquldaýyn talap etedi. CNN habarlaýynsha, Reseı de jospardy maquldaýy kerek.

Buǵan deıin Shveıtsarııa astanasynda Ulybrıtanııa, Frantsııa, Germanııa, Ýkraına jáne AQSh ókilderi Reseı men Ýkraına arasyndaǵy daǵdarysty retteý máselelerine qatysty kelissózderdi bastaǵanyn jazǵan bolatynbyz.