ShÝAQOV QOJAHMET

Shýaqov Qojahmet (1907-1990) - ǵalym-hırýrg, medıtsına ǵylymdarynyń doktory, professor, Qazaqstannyń eńbek sińirgen dárigeri, Qazaqstanǵa eńbek sińirgen ǵylym qaıratkeri.

Almaty oblysy Alakól aýdanynyń Sharbaqty aýylynda dúnıege kelgen. 1928 jyly Qazan qalasyndaǵy jumysshylar fakýltetin, 1936 jyly Almaty memlekettik medıtsınalyq ınstıtýtyn (qazirgi S.Asfendııarov atyndaǵy Qazaq ulttyq medıtsınalyq ýnıversıteti) bitirgen.

1936-1945 jyldary - Qaraǵandy oblysy Qarqaraly qalasynda aýdandyq aýrýhananyń hırýrgi, bas dárigeri, qalalyq aýrýhananyń bas dárigeri. 1945-1947 jyldary - Almaty memlekettik medıtsınalyq ınstıtýtynyń assıstenti, 1947-1956 jyldary - Qazaq klınıkalyq jáne eksperımenttik hırýrgııa ǵylymı-zertteý ınstıtýtynyń kishi ǵylymı qyzmetkeri, dırektordyń orynbasary. 1956-1963 jyldary - Semeı medıtsınalyq ınstıtýtynyń ( qazirgi Semeı memlekettik medıtsınalyq akademııasy) rektory. 1963-1981 jyldary Almaty memlekettik medıtsınalyq ınstıtýtynyń (qazirgi S.Asfendııarov atyndaǵy Qazaq ulttyq medıtsınalyq ýnıversıteti) kafedra meńgerýshisi qyzmetterin atqarǵan.

Negizgi ǵylymı eńbekteri ónerkásiptik jaraqattardan saqtaný, qorǵasynnan ýlanǵan jáne basqa aýrýlarǵa shaldyqqan adamdarda hırýrgııalyq joldarmen emdeý máselelerine arnalǵan.

Qojahmet Shýaqov 4 monografııanyń jáne 97 astam ǵylymı jumystardyń avtory. Onyń jetekshiligimen 13 kandıdattyq, 1 doktorlyq dıssertatsııa qorǵalǵan.

Eńbek Qyzyl Tý, «Qurmet Belgisi», Oktıabr Revolıýtsııasy ordenderimen jáne kóptegen medaldarmen marapattalǵan.

Derek kózi:

Qazaqstan ulttyq entsıklopedııasy, 9 tom.