Shrı-Lanka BRIKS-ke kirýge ótinish beredi

ASTANA. KAZINFORM — Shrı-Lanka Qazandaǵy sammıtte BRIKS pen BRIKS Jańa damý bankine qosylýǵa resmı ótinim berýdi josparlap otyr jáne qaýymdastyqqa múshe elderge onyń músheligin qoldaý týraly ótinishpen júgingen. Bul týraly Shrı-Lanka Syrtqy ister mınıstrliginiń basshysy Vıjıta Herat málimdedi, dep habarlaıdy TASS aqparat agenttigi. 

«Shrı-Lanka BRIKS pen Jańa Damý Bankine (BRIKS) qosylýǵa ótinim berý týraly sheshim qabyldady. Men BRIKS-ke múshe elderdegi áriptesterime hat joldap, qoldaý kórsetýdi suradym», — dep keltirdi Herattyń sózderin araldyq memlekettiń syrtqy saıası vedomstvosynyń resmı saıty.

Shrı-Lanka Syrtqy ister mınıstrligi basshysynyń aıtýynsha, eldiń jańa prezıdenti Anýra Kýmara Dıssanaıake men onyń ózi elde aldaǵy parlamenttik saılaýǵa baılanysty Qazanda ótetin BRIKS sammıtine qatysa almaıdy. 

«Syrtqy ister mınıstriniń orynbasary Shrı-Lanka atynan ókildik etip, múshelikke ótýge resmı túrde ótinim beredi», — dedi Herat.

Bul rette ol Qazanǵa baratyn mınıstr orynbasarynyń esimin ataǵan joq.

Shrı-Lanka BAQ atap ótkendeı, BRIKS sammıtine Shrı-Lanka Syrtqy ister mınıstriniń birinshi orynbasary Arýnı Vıjevardane barady.

«Biz BRIKS-ti BUU Jarǵysy aıasynda jan-jaqty kópjaqtylyqty nyǵaıtý arqyly ózara tıimdi yntymaqtastyqty, beıbitshilik pen damýdy júzege asyrý úshin tıimdi seriktestiktiń birlestigi retinde qarastyramyz», — dedi Herat.

Kazinform úshin arnaıy TASS seriktes agenttigi usynǵan.

Aıta keteıik, jaqynda «BRIKS Plıýs» memleketteri joǵary ókilderiniń kezdesýi ótti.

Buǵan deıin Malaızııa, Baký, Túrkııa jáne Ázerbaıjan syndy memleketter BRIKS-ke qosylýǵa ótinish berdi.