ShQO-daǵy Úlken Naryn aýdanynda jaǵdaı turaqtaldy
ÓSKEMEN. KAZINFORM – Shyǵys Qazaqstan oblysy Úlken Naryn aýdanynda aýlalardan sý shyǵarylyp, jaǵdaı turaqtaldy.
ShQO ákimdigi baspasóz qyzmetiniń málimetine súıensek, Úlken Naryn aýdanynyń Altynbel aýylyndaǵy jaǵdaı turaqtaldy. Keshe bul aýylda erigen qardan sý deńgeıi kóterilip, 10 aýlaǵa sý kirgen bolatyn.
– Qazirgi ýaqytta aýyldaǵy aryqtyń bógetteri kúsheıtilip, aýlaǵa kirgen sý motopompalar arqyly shyǵaryldy. Aýylǵa tónip turǵan qaýip joq, jaǵdaı tolyqtaı baqylaýǵa alyndy. Mamandar táýlik boıy jumys istep jatyr, - dedi aýdan ákiminiń mindetin atqarýshy Eldos Baırahmetov.
Sondaı-aq Úlken Naryn aýylynda 11 úıdiń aýlasynan sý shyǵaryldy. Aryqtar tereńdetilip, bógetter kúsheıtilýde. Jalpy aýdandaǵy jaǵdaıdy qalypqa keltirý úshin 92 adam jáne 16 tehnıka jumyldyrylǵan.
Eske salsaq, buǵan deıin ShQO-daǵy Úlken Naryn aýdanynda 21 úıdiń aýlasyn sý basqany habarlanǵan.
