ShQO-da jol sapasyna tekserý júrgiziledi
Jol sapasyna qatysty shaǵymdardyń kóbisi Óskemen men Semeı qalalarynyń turǵyndarynan túsýde. Bıyl oblystyq jáne aýdandyq mańyzy bar joldardan jalpy uzyndyǵy 137 shaqyrym bolatyn 9 ýchaskeni jóndeý josparlanǵan. Onyń ishinde 86 shaqyrym – oblystyq, 51 shaqyrym – aýdandyq mańyzy bar joldar.
«Budan bólek, qalalar men aýdandardyń 201 shaqyrymdyq kóshe joldaryn jóndeýge 7,4 mlrd teńge jumyldyryldy. Sonyń aıasynda «Aýyl - el besigi« baǵdarlamasyna sáıkes 34 eldi mekendegi 165 shaqyrym kóshe jolyn jóndeýge 3,7 mlrd teńge bólindi. «Úlken Naryn-Kúrshim» jolynyń 11 shaqyrymy, «Maqanshy-Jalańashkól» jolynyń 20 shaqyrymy, «Aıagóz-Qaraýyl-Semeı-Qaınar» jolynyń 11 shaqyrym, «Omby-Maıqapshaǵaı-Shilikti-Aqjar» jolynyń 20 shaqyrymy, «Kúrshim-Qaljyr» jolynyń 15 shaqyrymy, «Tavrııa-Kamenka-Troınıtskoe» jolynyń 10 shaqyrymy, «Sógir-barlyq-Aqsý» jolynyń 14 shaqyrymy, «Kúrshim-Aqsýat-Aqsýat» jolynyń 27 shaqyrymy jóndeledi», – dedi ShQO jolaýshylar kóligi jáne avtomobıl joldary basqarmasynyń basshysy Nurjan Jumadilov.
Aımaq basshysy Danıal Ahmetov ákimderge jol jóndeý jumystary barysyna baqylaýdy kúsheıtýdi tapsyrdy.
«Óskemen, Semeı qalalarynyń ákimderi oryndalǵan jumystardyń sapasyn qosymsha tekserip otyrsyn. Sondaı-aq kepildik merzimi bar, buǵan deıin engizilgen ýchaskelerdi tekserýi qajet. Kóshe joldaryn qaıta qurý, kúrdeli jáne ortasha jóndeý jumystaryn júrgizýdi erekshe baqylaýǵa alýdy tapsyramyn. Aıaqtalýy 2021 jylǵa josparlanǵan nysandardy paıdalanýǵa berýdi qamtamasyz etý qajet», – dedi Danıal Ahmetov.
Sondaı-aq ákim Buqtyrma sý qoımasy arqyly ótetin kópir qurylysy sapasynyń mańyzdylyǵyn atap ótti. Búgingi tańda Semeı qalasynda avtojol kópirin qaıta jańartýǵa jobalyq-smetalyq qujattama ázirlengen. Qazirgi ýaqytta joba memlekettik saraptamadan ótýde. Al jalpy quny 31,1 mlrd teńgeni quraıdy.
