ShQO-da jylý aqysy 7,8 paıyz qymbattady

ÓSKEMEN. KAZINFORM – Shyǵys Qazaqstan oblysynda qarasha aıynan bastap jylý tarıfi 7,8 paıyz qymbattady.

Óńirde osy aıdan bastap jylý aqysy ózgerdi. Naqty aıtqanda, 7,8 paıyz qymbattap otyr. Sondaı-aq endi jylýdyń quny turǵyn úıdiń jalpy aýmaǵyna, eseptegish quraldardyń bolýyna, úıdiń tozý deńgeıine baılanysty esepteledi.

«Eseptegishi bar jáne aýmaǵy 100 sharshy metrge jetpeıtin úıde turatyndarǵa baǵa ósimi az bolady. Olar úshin bir gıgakalorııanyń quny 3 326,74 teńge. Esepteý quraly bolmasa 4 764,45 teńge, eskirgen úılerde 3 970,38 teńge. Al aýmaǵy 100 sharshy metrden assa eseptegishpen 3 659,41 teńge, eseptegishsiz 5 240,90 teńge, eskirgen úılerde 4 367,42 teńge», - dep habarlady «Shyǵys Jylý» AQ-dan.

Al jalpy aýdany 200 sharshy metrden asatyn úıde turatyndarǵa bir gıgakalorııa baǵasy 7 391,69 teńge.

Eske salsaq, osyǵan deıin Aqtóbede turǵyndar jylý tarıfin páterdiń ár sharshy metrine tóleýge qarsy shyqqany habarlanǵan.