ShQO-da kóktemniń alǵashqy aıynda aýa raıy qandaı bolady
ÓSKEMEN. KAZINFORM — «Qazgıdromet» RMK Shyǵys Qazaqstan oblystyq fılıaly naýryz aıyna arnalǵan aýa raıy boljamyn jarııalady.
Kóktemniń kelýimen aqpan aıyndaǵy aıaz birshama báseńdeıdi. Sınoptıkterdiń málimetinshe, túngi aýa temperatýrasy -19-24°S-tan -3-8°S-qa deıin joǵarylaıdy. Al kúndiz -7-12°S-tan +2-7°S-qa deıin jylynady dep kútiledi.
Alaıda ekinshi onkúndiktiń basynda aýa temperatýrasy kúrt tómendeýi múmkin: túnde -19-24°S-qa, kúndiz -7-12°S-qa deıin sýytady.
— Jalpy, naýryz aıynda aqpandaǵydaı aýa temperatýrasy qubylyp turýy yqtımal. Sebebi bul sýyqtan keıin kún qaıta jylynady: kúndiz aýa temperatýrasy 5-10°S jylyny kórsetse, Shyǵys Qazaqstannyń ońtústiginde +13°S-qa deıin jetýi múmkin, — delingen aqparatta.
Úshinshi onkúndikte de temperatýra qubylyp turady. Túnde 0 men -5°S pen -8-13°S aralyǵynda bolsa, kúndiz +5-10°S-tan -3 ten +2°S-qa deıin qubylady. Óńirdiń shyǵys bóliginde túngi temperatýra -20°S-tan tómen túsýi yqtımal.
Aı boıy jaýyn-shashyn mólsheri normadan joǵary bolady dep boljanǵan. Sondaı-aq sekýndyna 15-20 metrge deıin jetetin ekpindi jel jıi soǵady.
Eske salsaq, osyǵan deıin demalys kúnderi 37 gradýs aıaz bolatyndyǵy habarlanǵan.