ShQO-da boranda adasyp ketken 2 balyqshy tabyldy

Shyǵys Qazaqstan oblysy Samar aýdanynda boranda adasyp ketken eki balyqshy aman-esen tabyldy, dep habarlaıdy Kazinform. 

9 qańtar kúni saǵat 17.00 shamasynda Samar aýdandyq polıtsııa bólimine Óskemen qalasynyń turǵyny habarlasty. Óz sózinde ol balyq aýlaýǵa ketken kúıeýiniń sol kúıi oralmaǵanyn jetkizdi.

«Anyqtalǵandaı, er adam 7 qańtarda dosymen birge Samar aýylynan 35 shaqyrym jerdegi Buqtyrma sý qoımasyna balyq aýlaýǵa ketken. Joǵalǵandardy izdeýge aýdandyq polıtsııa jáne tótenshe jaǵdaılar bólimderiniń jeke quramy, jol tazalaýshy uıymnyń 2 tehnıkasy jumyldyryldy. 8 saǵatqa sozylǵan izdestirý jumystarynyń nátıjesinde joǵalǵan jigitter aman-esen tabyldy», - delingen aqparatta. 

Balyqshylardyń aıtýynsha, olar aýa raıynyń nasharlaýyna baılanysty qaıtýǵa bel býǵan. Alaıda qarly borannan jol tappaı adasyp qalǵan.

Er adamdar Samar aýylyna jetkizilip, sondaǵy jataqhanaǵa jatqyzyldy.