ShQO-da bıyl 36 adam brýtsellez juqtyrdy
ÓSKEMEN. KAZINFORM — Shyǵys Qazaqstan oblysynda jyl basynan beri 36 adam brýtsellez juqtyrdy.
ShQO veterınarııa basqarmasynyń málimetine súıensek, bıyl óńir boıynsha 1120 iri qara brýtsellezben aýyrdy.
— Jyl saıyn brýtsellezben aýyrǵan mal sany azaıyp keledi. Máselen, osydan 3 jyl buryn 2374 iri qara osy aýrýǵa shaldyqqan bolatyn. Bul vaktsına saldyrý jumystary kúsheıtilgeniniń nátıjesi. Ol mal men adamdy 80%-ǵa qorǵaıdy, — deıdi basqarma basshysy Ramıl Saǵyndyqov.
Alaıda adamdar arasynda brýtsellez juqtyrǵandar azaımaı tur. Bıyl osyndaı 36 adam tirkeldi.
— Kúrshim, Glýbokoe men Úlken Naryn aýdandarynda aýyrǵandar sanynyń óskeni baıqalyp otyr. Barlyq naýqas emdelip shyqty. Ólim-jitim bolǵan joq, — deıdi oblystyq densaýlyq saqtaý basqarmasynyń basshysy Tólegen Jigitaev.
Eske salsaq, osyǵan deıin Pavlodarda jyl basynan beri 32 adam brýtsellez aýrýyn juqtyrǵany habarlanǵan.
