ShQO-da 26 mektep avtobýsy satyp alyndy
ÓSKEMEN. QazAqparat – Shyǵys Qazaqstan oblysynda bıyl 26 mektep avtobýsy satyp alynǵan, dep habarlaıdy QazAqparat tilshisi.
Bul jaıly búgin oblys ákimdiginde ótken jınalys barysynda aımaq basshysy Danıal Ahmetov málimdedi.
«Mektepterdi jańa oqý jylyna daıyndaý jumystary aıaqtaldy. Qazirgi ýaqytta jańadan salynǵan bilim ordalaryna qabyldaý júrip jatyr. Barlyq 647 mektep «Ashyq» baǵdarlamasyna qosylǵan. Al oqytýshylar men tehnıkalyq qyzmetkerler tolyqtaı COVID-19 ınfektsııasyna qarsy vaktsına aldy. Juqpaly aýrý keń taralyp ketpes úshin oqý protsesi dástúrli, qashyqtan jáne aralas formatta uıymdastyrylady», - dedi ol.
Oblys ákiminiń aıtýynsha, barlyq mektepte medıtsınalyq kabınetter jabdyqtalǵan. Balalardyń qaýipsizdigin qamtamasyz etý úshin beınebaqylaý men dabyl júıeleri ornatyldy.
«Oqýshylardy mektepke jetkizý óte ózekti máselelerdiń biri. Búgingi tańda 134 bilim berý mekemesinde osyndaı qıyndyq bar. Bıyl qosymsha 26 avtobýs satyp aldyq. Bilim basqarmasyna jaǵdaıdy taldap, taǵy qansha avtobýs qajettigi týraly aqparat berýdi tapsyrdym», - dedi Danıal Ahmetov.
