ShQO-da 13 mıgrant el aýmaǵynan shyǵaryldy

ÓSKEMEN. QazAqparat – Shyǵys Qazaqstan oblysynda kóshi-qon zańnamasyn buzǵan 13 sheteldik elden shyǵaryldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, óńirde 15-19 aqpan aralyǵynda «Mıgrant» jedel aldyn alý sharasy júrgizilýde.

«Eki kún ishinde kóshi-qon zańnamasyn buzǵany úshin 87 sheteldik azamat ákimshilik jaýapkershilikke tartyldy. Onyń 13-i el aýmaǵynan shyǵarylǵan. Sondaı-aq ýákiletti organdardyń ruqsatynsyz sheteldikterdi jumysqa alǵan 8 adam jaýapqa tartyldy. Máselen, olardyń biri Ózbekstan Respýblıkasynyń azamattaryn zańsyz jumysqa tartqan. Oǵan ÁQBtK-niń 519-baby 1-bóligi boıynsha 30 AEK mólsherinde aıyppul salyndy», - delingen habarlamada.

Budan bólek, Semeıde zańsyz kóshi-qon uıymdastyrýdyń bir faktisi tirkeldi. Jedel aldyn ala sharasy barysynda krımınaldyq polıtsııa qyzmetkerleri izdeýde júrgen 8 qylmyskerdi qolǵa túsirdi.