Іshki saýda erejelerine ózgerister engizildi
ASTANA. KAZINFORM — 2025 jylǵy 29 shildedegi Saýda jáne ıntegratsııa mınıstriniń buıryǵymen ishki saýda erejelerine, sondaı-aq saýda naryǵy qyzmetin uıymdastyrý qaǵıdasyna, onyń ishinde aýmaǵy, jabdyqtaý jáne qamtamasyz etýge qoıylatyn talaptarǵa ózgerister engizildi.
Erejede naqtylaǵandaı, ishki saýdany damytý jáne qazaqstandyq taýarlardyń, jumys jáne kórsetiletin qyzmettiń básekege qabilettiligin arttyrý maqsatynda ulttyq múddeni eskere otyryp, jergilikti atqarýshy organdar saýda qyzmetine qolaıly jaǵdaı jasaý jóninde sharalar ázirleıdi.
Іshki saýda sýbektileri men saýda jelileri saýda naryǵy arqyly taýarlardy ótkizý kezinde mindetti:
— Qazaqstanda jasalǵan taýarlardy arnaıy mańdaısha nemese «Qazaqstanda jasalǵan» degen jazýmen belgileý. Bul jazýdy qatar ornalasqan birneshe otandyq taýarǵa qoldanýǵa bolady;
— Qazaqstanda jasalǵan taýarlardy «Qazaqstanda jasalǵan» degen jazýmen qatar, suranysy joǵary ónimderdiń janynda kross-merchendaızıng ádisimen ornalastyrý;
— Qazaqstanda jasalǵan azyq-túlikti jalpy saýda alańynyń jáne azyq-túlikke arnalǵan sóreler keńistiginiń keminde 30 paıyzyn alatyndaı etip ornalastyrý;
— Otandyq taýarlardy vızýaldy jáne fızıkalyq turǵydan qoljetimdi oryndarǵa (kózge kórinetin) qoıý.
Eger bul kólemde qazaqstandyq azyq-túlik bolmaǵan jaǵdaıda, qalǵan oryndar men sóre keńistigi ishki saýda sýbektisiniń qalaýy boıynsha basqa taýarlarmen toltyrylady.
Sondaı-aq, azyq-túlikke arnalǵan saýda alańyn nemese sóre keńistigin bólý qazaqstandyq óndirýshi nemese qazaqstandyq ónimdi ótkizetin ishki saýda sýbektisiniń jazbasha ótinishi negizinde júzege asyrylady.
Eger ótinish bolmasa, saýda jelileri arqyly taýar ótkizetin ishki saýda sýbektileri qazaqstandyq óndirýshilerdi óz betimen tartýdy uıymdastyrady.
Óndirýshiler nemese jetkizýshiler tarapynan ótinishtiń bolmaýy nemese jetkiliksizdigi jaǵdaıynda bos turǵan saýda alańy men sóre keńistigi ózge taýarlardy satýǵa paıdalanylady.
— Kóterme-úlestirý ortalyǵy — aýyl sharýashylyǵy ónimderin ishki jáne syrtqy naryqta odan ári ótkizý úshin qabyldaý, saqtaý jáne bastapqy óńdeý (tazalaý, kalıbrleý, suryptaý, býyp-túıý jáne basqa qyzmet) boıynsha qyzmet kórsetetin, jemis-kókónis jáne ósimdik sharýashylyǵy ónimderin óndirý oryndaryna jaqyn ornalasatyn, azyq-túlikpen jumys isteýge arnalǵan, satyp alý, daıyndaý, bólý jáne ózge de operatsııalardy júzege asyrýǵa arnalǵan jyljymaıtyn múlik obektisi, — delingen qujatta.
Qazaqstanda shyǵarylǵan jáne sheteldik óndiristegi avtokólikter, mototsıklder men ózge de mototehnıka, sondaı-aq olarǵa arnalǵan nómirlik agregattar, eger menshik quqyǵyn rastaıtyn qujat jáne satý maqsatynda esepten shyǵarý qujaty bolǵan jaǵdaıda, komıssııalyq saýdaǵa qabyldanady.
Sonymen qatar, kórme-jármeńke saýdasy aıasynda oryndardy bólýge qatysty basymdyq qazaqstandyq taýar óndirýshilerge beriledi.
Odan bólek, ishki saýda sýbektileri áleýmettik mańyzy bar azyq-túlik óndiretin qazaqstandyq taýar óndirýshilermen kelisimsharttar jasasýy kózdelgen.
Buıryq 2025 jylǵy 12 tamyzdan bastap kúshine enedi.
Buǵan deıin elimizdegi kóleńkeli ekonomıkamen kúres jáne zańsyz taýar aınalymynyń aldyn alý baǵytyndaǵy jumys týraly Saýda jáne ıntegratsııa vıtse-mınıstri Áset Núsipov Máskeýde ótken halyqaralyq konferentsııada baıandaǵan edi.