Jetisý oblysynda «Sıvers alma aǵashynyń gúldeýi» festıvali joǵary deńgeıde ótti

Aýqymdy is-shara óńirdiń týrıstik áleýetin arttyrýǵa, ekologııalyq týrızmdi damytýǵa, tabıǵı murany nasıhattaýǵa jáne álemdik mańyzǵa ıe Sıvers jabaıy almasynyń tabıǵı qoryn saqtaý mádenıetin qalyptastyrýǵa baǵyttaldy.

Festıvalge 7 myńnan astam adam qatysyp, is-shara aıasynda 50-den astam bloger men ınflıýenser Jetisý óńiriniń týrıstik áleýetin keń aýdıtorııaǵa tanytýǵa úles qosty.

Aıta ketý kerek, Jetisý oblysy – jer betindegi barlyq mádenı alma sorttarynyń arǵy tegi sanalatyn Sıvers jabaıy almasynyń negizgi tabıǵı taralý aımaqtarynyń biri. Ǵalymdardyń baǵalaýynsha, atalǵan biregeı almanyń álemdik tabıǵı qorynyń shamamen 48 paıyzy osy óńirde shoǵyrlanǵan.

Festıval aıasynda qonaqtarǵa gúldegen Sıvers alma alqaptaryn tamashalaý múmkindigi usynylyp, pleinair formatyndaǵy sýretshiler baıqaýy, mádenı-kópshilik is-sharalar, ulttyq sport oıyndary, qolónershiler kórmesi, sheberlik saǵattary jáne kontserttik baǵdarlama uıymdastyryldy.

Baǵdarlamanyń mańyzdy bóliginiń biri halyqaralyq shyǵarmashylyq joba boldy. Onyń aıasynda Reseı, Qytaı, Ózbekstan, Qyrǵyzstan, Túrkııa jáne Qazaqstannan kelgen sýretshiler óz týyndylaryn usynyp, kórme qorytyndysy boıynsha mádenı baılanystardy damytýǵa jáne óńirdiń tabıǵı murasyn óner arqyly nasıhattaýǵa qosqan úlesi úshin marapattaldy.

Festıvaldiń basty mýzykalyq qonaqtary – qazaqstandyq oryndaýshylar Bayansulu men Qýandyq Rahym óner kórsetip, merekelik keshtiń shyraıyn asha tústi.

Qazaqstannyń respýblıkalyq is-sharalar kúntizbesine engen festıval óńirdiń týrıstik ımıdjin nyǵaıtýǵa, ishki jáne kelý týrızmin damytýǵa, sondaı-aq Jetisýdyń biregeı tabıǵı áleýetin halyqaralyq deńgeıde ilgeriletýge yqpal etetin mańyzdy mádenı-týrıstik alań retindegi ornyn taǵy bir márte aıqyndady.