ShYU sammıti: Astanadan Tıantszınge deıin
ASTANA. KAZINFORM — Qytaı búgin Shanhaı yntymaqtastyq uıymynyń 25-sammıtin ótkizedi. Bul sammıt tarıhyndaǵy eń aýqymdy jıyn bolmaq. Bir jyl buryn ShYU sammıti Astanada ótken bolatyn.
Mańyzdy qujattar paketi
Byltyr shilde aıynda Qazaqstanda ShYU-nyń «Kópjaqty dıalogty nyǵaıtý — ornyqty beıbitshilik pen órkendeýge umtylys» atty 24-shi sammıti ótti. Kezek boıynsha Qazaqstan tóraǵalyq etken kezeńde túrli salany qamtıtyn 140-tan astam is-shara uıymdastyryldy.
Sol jyldyń qorytyndysy retinde «Astana deklaratsııasy» qabyldanyp, 25 qujattan turatyn qomaqty paketke qol qoıyldy. Qorytyndy qujatta ShYU-ǵa múshe memleketter Almaty qalasynda BUU Óńirlik ortalyǵyn, ShYU Bıologııalyq qaýipsizdik jónindegi halyqaralyq agenttigin jáne ınvestıtsııalyq qor qurý týraly usynystary kórinis tapty.
ShYU quramy qalaı keńeıdi?
Astana sammıtinde Belarýs Respýblıkasy uıymǵa tolyqqandy múshe retinde resmı qabyldandy. Osylaısha ShYU quramy 10 memleketke deıin ósti.
«ShYU+» formaty
Astanadaǵy ShYU sammıtiniń taǵy bir tarıhı oqıǵasy — BUU Bas hatshysy Antonıo Gýtterısh, osy kezdesýge shaqyrylǵan birqatar memleket basshylary men óńirlik halyqaralyq uıymdardyń basshylary alǵash ret «ShYU+» formatynda kezdesti.
Tıantszın sammıti
ShYU-nyń 25-sammıti 31 tamyz ben 1 qyrkúıek aralyǵynda Qytaıdyń Tıantszın qalasynda ótedi.
Tóraǵalyq kezegin alǵan Qytaı ShYU aıasynda 100-den astam kezdesý men is-shara ótkizdi.
Memleket basshylary keńesiniń aldaǵy otyrysyn QHR Tóraǵasy Sı Tszınpın basqarady.
QHR Syrtqy ister mınıstriniń kómekshisi Lıý Bın «ShYU+» formaty bıyl da jalǵasatynyn aıtady.
— «Tıantszın» deklaratsııasy men «ShYU-nyń 2035 jylǵa deıingi damý strategııasyn qabyldaý sammıttiń basty oqıǵalary bolady. Bul qujattar osyǵan deıin mınıstrler deńgeıinde maquldanǵan. Sammıt baǵdarlamasynda Sı Tszınpın uıymǵa múshe elderdiń basshylaryn arnaıy qabyldap, ekijaqty kezdesýler ótkizedi, — degen bolatyn Lıý Bın.
Jalpy ShYU sammıtine bıyl 20-dan astam eldiń basshylary qatyspaq.
Aıta ketý kerek, keshe Prezıdent ShYU sammıtine qatysý úshin Tıantszın qalasyna bardy.