Shymkentte joǵalyp ketken 6 bala tabyldy
Joǵalǵandardyń barlyǵy 15-16 jastaǵy jasóspirimder. Olardyń ata-analary balalarynyń otbasyndaǵy janjaldan keıin úıden shyǵyp, qaıta oralmaǵany týraly polıtsııaǵa málimdegen, dep habarlaıdy QazAqparat Otyrar.kz-ke silteme jasap.
Tártip saqshylary joǵary synypta oqıtyn eki ul men tórt qyzdy taýyp, az ýaqyt ishinde aman-esen úılerine jetkizdi. Mektep oqýshylarynyń biri jaı kóshede júrse, endi biri joldastarynyń úıinde qonaqta bolǵan.
Jetkinshekterdiń mundaı minez-qulyq kórsetýine úlkenderdiń baqylaýynan qutylyp, qalaǵan nársesin isteýge umtylýy sebep bolǵany anyqtaldy.
Máselen, jigitterdiń biri ǵashyq bolǵanyn, biraq anasy oǵan qyzben kezdesýge tyıym salǵanyn jetkizdi. Taǵy bir boıjetken bul áreketin ata-anasynan bólek turǵysy keletinimen túsindirse, endi biri dostaryna keshke deıin syrtta júrýge ruqsat etilgenimen, oǵan ruqsat joq dep shaǵymdandy.
Polıtsııa qyzmetkerleri jasóspirimdermen jáne olardyń zańdy ókilderimen profılaktıkalyq áńgime júrgizdi. Óz kezeginde ata-analar polıtsııa qyzmetkerlerine jedel jumys atqaryp, ózgeniń basyna túsken iske nemquraıly qaramaǵany úshin alǵys bildirdi.
"Balanyń úıden óz betinshe ketýiniń sońy qaıǵyly oqıǵalarǵa ákelýi múmkin. Buǵan jol bermeý úshin ata-analarǵa qyraǵy bolý usynylady. Sondaı-aq, kámeletke tolmaǵan balańyzdyń aınalasyna nazar aýdaryp, onyń dostarynyń meken-jaıy men baılanys nómirlerin bilip júrińiz, balanyń bos ýaqytyn aldyn ala josparlap, uıymdastyryp, kún saıyn onyń jetistikteri men qıyndyqtary týraly sóılesińizder", - dep eskertti Shymkent qalasy polıtsııa departamenti.
