Shymkentte tumaý juqtyrýshylar kóbeıdi

ShYMKENT. KAZINFORM - Shymkent qalasynda 16 qyrkúıekten tumaýǵa qarsy egý jumystary bastaldy. Bul týraly Shymkent qalasynyń SEBD basshysy Ábdimanap Tólebaev málimdedi. 

Shymkentte JRVI aýrýshańdyǵy 14,15%-ǵa tómendegenimen, tumaý juqtyrýshylar sany 1,66 esege joǵarylap otyr. Ótken epıdemıologııalyq maýsymda 139 turǵyn tumaýmen naýqastanǵan. Aýyrǵandardyń ishinde 14 jasqa deıingi 46 bala bar.

«Jergilikti bıýdjet qarajaty esebinen aýrýshańdyqtyń aldyn alý maqsatynda 150 000 doza «Grıppol+» vaktsınasy (óndirýshi Reseı) satyp alyndy. Medıtsına qyzmetkerleri, medıtsınalyq uıymda dıspanserlik esepte turǵan balalar, ata-ana qamqorlyǵynsyz qalǵan balalar men sábıler úıleriniń balalary, qarttar úıleriniń kontıngentteri, 2,3 trımestrdegi júkti áıelder, epıdemıologııalyq kórsetilimmen tumaýǵa qarsy tegin egiledi», - dedi Ábdimanap Tólebaev. 

Bir aıta keterligi, tumaýǵa qarsy ekpe egý úshin árbir adamnyń jazbasha túrdegi aqparattyq kelisimi qajet. 

«JRVI/tumaýdyń aldyn alýdyń eń tıimdi joly – tumaýǵa qarsy egý. Aýrýdyń belgileri – jalpy álsizdik, murynnyń bitýi, tamaqtyń qyshýy, 3-5 kúnnen astam ýaqyt dene qyzýynyń 38-40°S joǵarylaýy, bastyń qatty aýyrýy, sondaı-aq demikpe, estiń buzylýy, aıaq-qoldyń tartylýy, aıaqta gemorragııalyq bórtpelerdiń paıda bolý. JRVI/tumaýdyń asqynýy vırýsty jáne bakterıaldy pnevmonııaǵa, otıt, gaımorıt, menıngıt, entsefalıt, sonymen qatar septıkalyq asqynýlarǵa ákelip soqtyrýy múmkin. Óte aýyr jaǵdaılarda aýrý ólimmen aıaqtalady», - dedi Ábdimanap Tólebaev.