Shymkentte kásipkerden 20 mln teńge bopsalaǵan kúdikti ustaldy

ASTANA.KAZINFORM — Polıtsııa jergilikti kásipkerden iri kólemde aqsha bopsalaý faktisiniń jolyn kesti, dep habarlaıdy Polisia.kz.

Tergeý barysynda kúdiktiniń qoǵamdyq tamaqtaný ornyna birneshe ret kelip, nysandy beınejazbaǵa túsirip, keıin ıesine qysym kórsetkeni belgili boldy.

— Kúdikti túrli ýákiletti organdar tarapynan «tekserý uıymdastyryp», bıznesin japtyramyn dep qorqytqan. Osylaısha kúdikti kásipkerden 20 mıllıon teńge talap etken. Jedel is-sharalar barysynda kúdikti ustalyp, ýaqytsha ustaý ızolıatoryna qamaldy. Bopsalaý jaıty boıynsha qylmystyq is qozǵalyp, sotqa deıingi tergeý áreketteri júrgizilip jatyr, — delingen habarlamada.

Polıtsııa eshbir tulǵa tekserý júrgizemin dep nemese aqparat taratamyn dep qorqytyp, aqsha talap etýge quqyly emes ekenin eskertedi. Mundaı jaǵdaıǵa tap bolsańyz, dereý polıtsııaǵa júginý qajet.

Buǵan deıin qyzylordalyq kásipkerler 252,2 mln teńge grant qarjysyn ońdy-soldy shashqany anyqtaldy.