Shymkentte esirtki taratqan eki áıel ustaldy

ShYMKENT. KAZINFORM — Qazirgi tańda kúdiktiler qamaýda.

28 jáne 31 jastaǵy áıelder sıntetıkalyq esirtki taratýmen aınalysqan. Qala aýmaǵynda esirtki oramalaryn jasyryp, ol oryndardyń koordınattarymen messendjerde bólisip otyrǵan.

Qylmystyq áreketin júzege asyrý úshin olar jalǵa páter alyp, onda esirtki zattaryn dozalarǵa bólip oraýmen aınalysqan. Ustalǵandardan jalpy salmaǵy 90 grammdy quraıtyn mefedron salynǵan 60 orama tárkilendi.

— Kúdiktilerdi polıtsııa «Zań jáne Tártip» qaǵıdatyn iske asyrýǵa baǵyttalǵan arnaıy is-sharalar barysynda ustady. Esirtki zattaryn asa iri mólsherde ótkizgeni úshin olar uzaq jyldarǵa bas bostandyǵynan aıyrylýy múmkin, — delingen Shymkent qalasy polıtsııa departamentiniń baspasóz qyzmeti taratqan aqparatta. 

Aıta keteıik, budan buryn Túrkistan oblysynda týystaryn aıaýsyz óltirgen kúdiktilerge qatysty sot otyrysy bastalǵanyn jazǵan bolatynbyz.