Shymkentte burynǵy áıelin jaralaǵan kúdikti qamaýǵa alyndy - ІІM

ASTANA. KAZINFORM - QR Іshki ister mınıstriniń orynbasary Sanjar Ádilov Shymkentte burynǵy áıeline pyshaq alyp júgirgen kúdiktige qatysty is boıynsha pikir aıtty.

Buǵan deıin áleýmettik jelide Shymkentte burynǵy kúıeýi áıeliniń moıny men omyrtqasyn pyshaqpen jaralaǵany týraly aqparat tarady. Jábirlenýshiniń tórt balasy bar.

- Atalǵan derek boıynsha «densaýlyqqa aýyr zııan keltirý» baby boıynsha qylmystyq is qozǵaldy. Qazirgi ýaqytta kúdikti sot sheshimimen qamaýǵa alyndy. Tıisti tergeý amaldary júrip jatyr. Tergeý aıasynda keshendi medıtsınalyq saraptama jasalady. Men bul qylmystyq isti jeke baqylaýymda ustaımyn, - dedi S. Ádilov Parlament Májilisinde tilshiler suraǵyna jaýap bere otyryp.

Buǵan deıin QR Іshki ister mınıstriniń orynbasary Sanjar Ádilov Jambyl oblysynda janarmaı quıý beketinde mototsıkl júrgizýshisin jaralaǵan kúdikti eki aıǵa qamaýǵa alynǵanyn aıtty.