Shymkentte 500 dana pırotehnıkalyq ónim tárkilendi
ASTANA. KAZINFORM — Shymkent qalasynda quny 1 mln 200 teńge turatyn 500 dana pırotehnıkalyq ónim tárkilendi. Bul týraly ІІM baspasóz qyzmeti habarlady.
Shymkent qalasynda reıdtik is-sharalar barysynda polıtsııa qyzmetkerleri pırotehnıkalyq buıymdardy saqtaý talaptarynyń óreskel buzylýymen baılanysty zańsyz satý faktilerin anyqtady. Eki kásipker áıel pırotehnıkalyq ónimderdi satýmen aınalysqan. Alaıda ónimder qaýipsizdik talaptaryna saı kelmeıtin qoıma oryndarynda saqtalǵan.
— Pırotehnıkalyq buıymdar belgilengen normalar saqtalmaı, tıisti jaǵdaılar qamtamasyz etilmegen kúıde ornalastyrylǵan. Bul olardyń ózdiginen tutanyp ketýine ákelip, jarylys qaýpin týdyrýy múmkin bolǵan. Jalpy sany shamamen 500 dana pırotehnıkalyq ónim tárkilendi. Olardyń jalpy quny 1 200 000 teńgeni quraıdy, — delingen aqparatta.
Mundaı zań buzýshylyqtar azamattardyń ómiri men densaýlyǵyna qaýip tóndiredi, sondaı-aq órt jáne basqa da tótenshe jaǵdaılardyń týyndaý qaýpin arttyrady. Polıtsııanyń der kezinde aralasýy yqtımal aýyr saldardyń aldyn alýǵa múmkindik berdi.
Qazirgi ýaqytta anyqtalǵan jaıttar boıynsha zańnamaǵa sáıkes sharalar qabyldandy.
Polıtsııa pırotehnıkalyq buıymdardy paıdalaný kezinde qaýipsizdik talaptaryn qatań saqtaýdy eskertedi. Atap aıtqanda, olardy saqtaý, tasymaldaý jáne satý kezinde belgilengen erejelerdi buzbaý qajet.
Aıta keteıik, Qytaıdyń Hýbeı provıntsııasynda pırotehnıkalyq buıymdar dúkeninde jarylys bolyp, 12 adam kóz jumdy.
