Shyǵys Qazaqstanda sý tasqynynyń ekinshi kezeńi bastaldy
ÓSKEMEN. KAZINFORM — Shyǵys Qazaqstan oblysynda sý tasqynynyń ekinshi kezeńi bastaldy.
ShQO tótenshe jaǵdaılar departamenti baspasóz qyzmetiniń málimetine súıensek, búgingi tańda óńir aýmaǵynyń 44 paıyzynda áli qar jatyr.
«Taýly aımaqtarda jáne taýlardyń ońtústik betkeılerinde qar erýine baılanysty oblysta sý tasqynynyń ekinshi tolqyny bastaldy. Soltústik, soltústik-shyǵys jáne shyǵys bóliktegi aýdandar erekshe baqylaýda. Olar Rıdder qalasy, Altaı, Samar, Marqakól, Glýbokoe, Katonqaraǵaı, Kúrshim jáne Shemonaıha aýdandary» delingen aqparatta.
Sý tasqyny qaýpin baqylaý úshin tikushaqpen Óskemen-Altaı-Katonqaraǵaı baǵyty boıynsha aerovızýaldy monıtorıng júrgizildi.
Oǵan oblys ákiminiń orynbasary Baqytjan Baıahmetov, ShQO TJD bastyǵy Erǵalı Bahaev jáne basqa da múddeli organdardyń mamandary qatysty.
«Sonyń nátıjesinde, Sarymsaqty taýynyń ońtústik bókteriniń taza ekeni belgili boldy. Zýbovsk jáne Maleevsk kentterindegi ózende júrgizilgen jaǵalaýdy nyǵaıtý jumystary qaraldy. Qazir Shyǵys Qazaqstandaǵy barlyq gıdrotehnıkalyq qurylystar shtattyq rejımde jumys istep tur» delingen habarlamada.
Jergilikti atqarýshy organdar kanaldardy, aryqtardy jáne kópirlerdi tazartý boıynsha josparlanǵan jumystardy tolyqtaı júrgizdi. Jaǵalaýdy nyǵaıtý jáne ózenderdiń túbin tereńdetý, ydys-qaptardy tóseý jumystary jalǵasyp jatyr.
