Túrkııa 2026–2035 jyldar aralyǵyn «Otbasy jáne demografııa onjyldyǵy» dep jarııalady
ASTANA. KAZINFORM — Túrkııa prezıdenti Rejep Taıyp Erdoǵan 2026–2035 jyldar aralyǵyn «Otbasy jáne demografııa onjyldyǵy» dep jarııalaǵanyn málimdedi. Bul týraly Anadoly agenttigi jazdy.
Stambýlda ótken «2026–2035 jyldarǵa arnalǵan otbasy jáne demografııa onjyldyǵynyń tujyrymdamasy» atty is-sharada sóz sóılegen memleket basshysy otbasy ınstıtýtynyń álsireýi qoǵamnyń álsireýine ákeletinin atap ótti. Onyń aıtýynsha, «myqty otbasy — myqty adamdy, al myqty adam — myqty qoǵamdy qalyptastyrady».
Erdoǵan elde nekege turý jasynyń ulǵaıyp, ajyrasý sanynyń artýy týý kórsetkishiniń tómendeýine áser etip otyrǵanyn aıtty. 2017 jyldan beri Túrkııada týý deńgeıi halyqtyń udaıy ósý sheginen (2,1) tómen túsken. Sondaı-aq 11,1% quraıtyn qarttar úlesi ósip kele jatqany, al keıbir aýyldyq jerlerde qarttardyń sany balalardan asyp ketkeni atap ótildi.
Soǵan qaramastan, Túrkııa Eýropalyq Odaq elderinen shamamen 10 jasqa «jas» memleket ekenin aıtqan prezıdent, úkimet demografııalyq táýekelderdi azaıtý úshin qazirden bastap sharalar qabyldap jatqanyn jetkizdi.
Onyń aıtýynsha, 2026–2035 jyldarǵa arnalǵan negizgi bes strategııalyq baǵyt aıqyndalǵan: otbasy ınstıtýtyn jáne bolashaq urpaqty qorǵaý, nekeni nyǵaıtý, týý deńgeıin arttyrý, jastardyń sapaly bilim alýy men qarttardyń ál-aýqatyn qamtamasyz etý, sondaı-aq aýyl aımaqtardy damytý jáne halyqty teńgerimdi ornalastyrý.
Sonymen qatar, mamyr aıynyń sońǵy aptasy jyl saıyn «Ulttyq otbasy aptalyǵy» retinde atalyp ótetini de habarlandy.
Eske sala keteıik, buǵan deıin Túrkııada sheteldikterdiń turaqty turýyna beriletin ruqsat quny qymbattaǵanyn jazdyq.
