Shyǵys Qazaqstanda bir top áje ándete kelip daýys berdi

ÓSKEMEN. KAZINFORM — Shyǵys Qazaqstan oblysyndaǵy Ulan aýdanynyń ájeler keńesi ulttyq dástúrdi ulyqtap, el bolashaǵyna beıjaı qaramaıtyn azamattyq ustanymdaryn kórsetti. 

Aq jaýlyqtaryn taǵyp, ulttyq kıim, kımeshekterin kıgen ájeler bir ýaqytta ándete kelip, daýys berdi.

Sondaı-aq Zaısan aýdany Daıyr aýyldyq okrýginiń № 600 referendým ýchaskesindegi mańyzdy saıası naýqan erekshe merekelik sıpatta ótip jatyr.

Daıyr aýylynyń eń qart turǵyn, 104 jasqa kelgen Mılanııa Pavlovnanyń qurmetine qurylǵan «Ǵasyr áje» halyqtyq án-bı ansambliniń músheleri kelip, óz tańdaýlaryn jasady.

Ansambl quramyndaǵy ájelerdiń úlkeni 85 jasta bolsa, eń jasy 75-te. Aq jaýlyqty analar saılaý ýchaskesine ulttyq naqyshtaǵy kıimderimen kelip, shashý shashyp, jınalǵandarǵa ystyq baýyrsaq taratty. Sonymen qatar apalar óz qoldarynan shyqqan biregeı qolóner buıymdaryn jurtshylyq nazaryna usyndy.

— Búgingi tańdaýymyz — bolashaq urpaqtyń baqytty ómiri men elimizdiń turaqtylyǵy úshin jasalǵan mańyzdy qadam, — dedi aq jaýlyqty analar.

Aıta keteıik, oblysta barlyǵy 533 saılaý ýchaskesi qurylǵan. Onyń 501-i tirkeý orny boıynsha, al 32-si ýaqytsha bolatyn oryndarda ornalasqan. Ýchaskelerdiń 129-y nemese 24,2 paıyzy Óskemen qalasynda.

Eske salsaq, buǵan deıin Mańǵystaý turǵyndary referendýmǵa ulttyq kıimmen kelý chellendjin bastaǵany habarlanǵan.