Shyǵys Qazaqstanda 3 adamǵa ıis tıdi

ÓSKEMEN. KAZINFORM – Shyǵys Qazaqstan oblysy Ulan aýdanynda ıis tıgen 3 adam aýrýhanaǵa jatqyzyldy.

ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa Ulan aýdany Gagarın aýylyndaǵy jer úıde bolǵan.

Úı ıesi murjany ýaqtyly tazalamaǵan. Sonyń saldarynan ýly gaz shyǵyp, bólmelerge tarap ketti.

«1966 jáne 1991 jyly týǵan eki er adam men 1967 jylǵy áıelge ıis tıdi. Olardyń barlyǵy shuǵyl túrde aýrýhanaǵa jatqyzyldy», - dep habarlady vedomstvo ókilderi.

Osy rette, qutqarýshylar halyqty peshti jylytý kezinde qaýipsizdik talaptaryn saqtaýǵa shaqyrdy. Peshti úsh aıda keminde bir ret kúlden, ystan tazartyp otyrý kerek.