Shyǵys Qazaqstan turǵyndaryn kene shaǵa bastady

ÓSKEMEN. KAZINFORM – Shyǵys Qazaqstan oblysynda eki adamdy kene shaqty.

Bıyl óńirde keneler ádettegiden erte shyqty. Dárigerlerge keneden zardap shekken 2 adam júgingen. Ekeýine de kene ımmýnoglobýlıni egildi.

- Qazirgi tańda oblystaǵy medıtsınalyq mekemelerde kene shaqqan adamdarǵa shuǵyl profılaktıkalyq kómek kórsetý úshin ımmýnoglobýlın qory jetkilikti. Keneniń belsendiligi aýa raıy jaǵdaıyna baılanysty. Negizinen kene maýsymy sáýirden qyrkúıekke deıin sozylady. Eń qaýipti kezeń - mamyr-maýsym aılary, - deıdi ShQO Sanıtarlyq-epıdemıologııalyq baqylaý departamenti basshysynyń mindetin atqarýshy Sáýle Slıamǵazına.

Aıta keteıik, keneler tek qana kene entsefalıtiniń ǵana emes, kene súzegi, kene borrelıozy (Laıma aýrýy) sııaqty basqa da ınfektsııalarynyń tasymaldaýshysy.

Eske salsaq, buǵan deıin Túrkistan oblysynda ana ólimi eki ese óskeni habarlanǵan.