Sheteldik shottar: 5,4 mlrd teńge bıýdjetke qalaı qaıtaryldy
ASTANA. KAZINFORM – Qazirgi tańda offshorlyq ıýrısdıktsııalarda ashylǵan azamattarymyzdyń banktik shottaryndaǵy aqsha somasy 1,4 mlrd teńge.
Jyl saıyn EYDU-ǵa qatysýshy elderdiń quzyretti organdary avtomatty almasýdyń biryńǵaı standarty (CRS) sheńberinde jeke jáne zańdy tulǵalardyń, sondaı-aq benefıtsıarlyq menshik ıeleriniń shottary týraly derektermen almasady.
- Derekter almasýdyń arqasynda Qazaqstan bıýdjetine 5,4 mlrd teńge tústi. Memlekettik kirister komıteti shet memleketterdiń salyq organdarynan alynǵan aqparat negizinde Qazaqstannyń 2 myńnan astam rezıdentine tekserý júrgizdi. Nátıjesinde 1 602 qazaqstandyq 5,4 mlrd teńge somasyna JTS tóledi. Alynǵan kiristerden, sonyń ishinde dıvıdendter men syıaqylar túrindegi eń kóp soma Birikken Arab Ámirlikteri, Ulybrıtanııa, Qytaı Halyq Respýblıkasy, Túrkııa jáne t. b. elderge tıesili, - delingen Memlekettik kirister komıteti habarlamasynda.
Qazirgi tańda offshorlyq ıýrısdıktsııalarda ashylǵan azamattarymyzdyń banktik shottaryndaǵy aqsha somasy 1,4 mlrd teńge.
- Eń kóp soma Panama respýblıkasy 1,2 mlrd teńge, Vanýatý 0,2 mlrd teńge, San-Marıno 0,1 mlrd teńge sııaqty elderge jáne t. b. tıesili, - delingen habarlamada.
Qazaqstan CRS sheńberindegi yntymaqtastyq geografııasyn keńeıtýdi jalǵastyryp jatyr.
Eger 2021 jyly derekter almasý 51 ıýrısdıktsııamen júzege asyrylsa, 2024 jyly olardyń sany 89-ǵa jetti, onyń ishinde 26 offshorlyq el. EYDU ázirlegen bul tetik kapıtaldy zańsyz shyǵarýǵa qarsy kúreste mańyzdy qural jákirisne shetelde shottary bar qazaqstandyqtardyń kiristerinen salyqtardy tıimdi ákimshilendirýge kómektesedi.
Osylaısha, Qazaqstan salyqtyq ashyqtyq salasyndaǵy halyqaralyq yntymaqtastyqty nyǵaıtady, bul bıýdjet túsimderiniń ulǵaıýyna yqpal etpek.
Eske salsaq Álıhan Smaıylov Prezıdentke esep bergen kezde bıýdjetke 135 mlrd teńge qaıtarylǵany týraly aıtqan edi.