Shetelden bıdaı tasymaldaýǵa tyıym salynady
ASTANA. KAZINFORM — Aýyl sharýashylyǵy mınıstrligi «Qazaqstan aýmaǵyna avtomobıl, sý jáne temirjol kóligimen bıdaı ákelýge tyıym salýdy engizý týraly» buıryq ázirledi. Qujat «Ashyq» NQA portalynda jaryq kórdi.
Qujatta el aýmaǵyna úshinshi elderden jáne Eýrazııalyq ekonomıkalyq odaq elderinen avtokólik, sý kóligi jáne temirjol arqyly bıdaı ákelýge 6 aıǵa tyıym salynatyny jazylǵan.
Dese de bıdaıdy temirjol kóligimen óndirý jáne tutyný maqsatynda qus sharýashylyǵy jáne un tartý kásiporyndaryna ákelýge ruqsat bar. Qujatta kórsetilgendeı, osy maqsatta ákelingen bıdaı ishki jáne syrtqy naryqta satylymǵa shyǵarylmaıdy.
«Bul tyıym Qazaqstan aýmaǵynan tys jerlerde bastalatyn jáne aıaqtalatyn temirjol tranzıttik tasymaly aıasynda el aýmaǵyna ákelinetin bıdaıǵa áser etpeıdi» — delingen buıryqtyń mátininde.
Qujattyń túsindirmesinde 2023 jyly 17,1 mln tonna dándi daqyl jınalǵany, onyń ishinde 12,1 mln tonna bıdaı bar ekeni kórsetilgen. Óńdeý jáne eksportqa jóneltý kólemin eskere otyryp, 2024 jyldyń 1 naýryzynda dándi daqyl 11,5 mln tonnany quraǵan.
«Azyq-túlik korporatsııasy 350 myń tonna jemdi tikeleı satyp alýdy júzege asyrdy. Osylaısha, ishki naryqta azyq-túlik jáne jemniń jetkilikti qory bar. Sonymen qatar Reseıden astyqtyń qosymsha túsimi jalǵasyp jatyr, bul ishki naryqtaǵy suranystyń jáne baǵanyń tómendeýine ákeledi» - delingen qujattyń túsindirmesinde.
2023 jyly Reseıdiń bıdaı ımporty 1,9 mln tonnany qurady, bul 2022 jylǵy deńgeıden 31%-ǵa artyq (1,46 mln tonna), onyń negizgi kólemi jumsaq bıdaı — 1,8 mln tonna (1,39 mln. tonna nemese 31%).
Al, QTJ derekteri boıynsha 2024 jyldyń qańtar aıynda Reseı Federatsııasynan temir jol arqyly 174 myń tonna bıdaı ákelindi, bul 2022 jylǵy deńgeıden 35% - ǵa kóp.
2023 jyly Reseı Federatsııasynan bıdaı ımporty 1,9 mln. tonnany qurady, bul 2022 jylǵy deńgeıden 31% - ǵa artyq (1,46 mln.tonna), onyń negizgi kólemi jumsaq bıdaı-1,8 mln. tonna (1,39 mln. tonna nemese 31%).
Sondaı-aq qujatta jazda sý kóligi arqyly 29 myń tonna bıdaı ákelingeni kórsetilgen. Bul ishki naryqta reseı bıdaıynyń kólemin arttyryp otyr.
Importtyń ósýi bıdaıdy satý máselesin odan ári ýshyqtyrǵany baıqalǵan. Astyqty satý naryǵynyń bolmaýy aýyl sharýashylyǵy taýarlaryn óndirýshilerdiń qarjy jaǵdaıynyń nasharlaýyna alyp keledi, bul 2024 jylǵy egis naýqanynyń buzylýyna ákelýi múmkin. Sol úshin bul shara egis naýqanynyń buzylmaýy úshin iske asyrylmaq.
Buıryq jobasy 2024 jyldyń 26 naýryzyna deıin kópshilik talqysyna shyǵarylǵan.
