Sheteldegi qazaq balalary Býrabaıda demalady

ASTANA. KAZINFORM - Dúnıejúzi qazaqtary qaýymdastyǵynyń uıymdastyrýymen, Oqý-aǵartý mınıstrliginiń qoldaýymen «Baldáýren» balalardy saýyqtyrý ortalyǵyna sheteldegi qazaq balalary kelip demalady. Bul týraly QazAqparat tilshisine Dúnıejúzi qazaqtary qaýymdastyǵy tóraǵasynyń keńesshisi Qarlyǵash Bekpatshaqyzy aıtyp berdi.

- Bul joba, 2003 jyly jeti baladan bastalǵan bolatyn. 2017 jyly ótken sońǵy besinshi quryltaıdan keıin qaýymdastyq tóraǵasynyń birinshi orynbasary Zaýytbek Qaýysbekuly mınıstrge kirip, berilgen kvota sanyn kóbeıtýge yqpal etti. Bıylǵy jazǵy demalysqa 288 bala kelý josparlanǵan. Aldyńǵy tájirıbelerge súıene otyryp berilgen kvota sheteldegi qazaq dıasporasyna kelesi tártippen bólingen edi: Reseı - 55, Mongolııa - 55, Ózbekstan - 55, Tájikstan - 10, Qytaı - 55, Qyrǵyzstan - 35, Eýropa - 4, Túrkııa - 5, Aýǵanstan - 5, Saýd Arabııasy - 5, Túrkimenstan - 2, Iran - 2. Alaıda álemdegi turaqsyzdyqqa baılanysty Evropa men Túrkııada turatyn balalar kelmeıtin boldy, - deıdi Qarlyǵash Bekpatshaqyzy.

Onyń aıtýynsha sharaǵa joldama alǵan balalar óner, bilim, sport baǵyty boıynsha iriktelgen degen kil myqtylar.

- Ótinish bildirgen qandastardyń ishinen jetistigi bar, ártúrli sala boıynsha júlde alǵan daryndy balalar irikteledi. Sharanyń basty maqsaty – sheteldegi qazaq balalaryn Atajurtymen baılanystyrý. Qazaq ultynyń bolymys, bitimin, salt-dástúrin, tili-dinin tereńdeı túsinýge kómektesý. Sol arqyly olardyń bolashaqta elge kelip, oqyp, osynda bir kisilik eńbek etýine jol ashý, - deıdi Qarlyǵash Bekpatshaqyzy

Aıta keteıik, 2025 jylǵy 7-21 shilde aralyǵynda "Baldaýren" respýblıkalyq oqý-saýyqtyrý ortalyǵynda «Men Qazaqryn» Halykaralyq balalar quryltaıy (Aqmola oblysy, Býrabaı aýdany) ótedi.

Buǵan deıin Iran men Qytaıdan oralǵan qandastardyń teriskeıdegi tynys-tirshiligi týraly jazǵanbyz.