Shetel valıýtasyna suranys tómendedi

ASTANA. QazAqparat - 2022 jylǵy qańtar-jeltoqsanda aıyrbastaý pýnktterinde qazaqstandyqtar arasynda tanymal AQSh dollary, eýro jáne Reseı rýbliniń taza satylymy 2,4 trln teńgeni qurady. Bul 2021 jyldyń sáıkes kezeńimen salystyrǵanda 22,4 paıyzǵa az, dep habarlaıdy QazAqparat.

Ranking.kz portalynyń málimetinshe, aıyrbastaý pýnktterindegi shetel valıýtasyn taza satylymynyń 1,8 trln teńgeden astamy AQSh dollaryn qurady. Al 2021 jylǵy qańtar-jeltoqsanmen salystyrǵanda satylym kólemi 10,1 paıyzǵa tómendedi. Odan keıin satylym kólemi 7,4 paıyzǵa, 301,9 mlrd teńgege deıin tómendegen eýro tur. Reseı rýbliniń taza satylymy birden 2,7 ese, 281 mlrd teńgege deıin qysqardy.

Óńirler boıynsha aıyrbastaý pýnktteriniń AQSh dollaryn taza satylymynyń jartysynan astamy tek eki megapolıstiń úlesine tıesili: Almaty men Shymkent. Bul rette Almatyda taza satylym kólemi bir jylda 35,5 paıyzǵa ósip, 712,1 mlrd teńgeni qurasa, Shymkentte kerisinshe 2 esege jýyq azaıyp, 297,2 mlrd teńge boldy.

Aıyrbastaý pýnktteriniń AQSh dollaryn taza satý kólemi Astana (103,5 mlrd teńge), Atyraý (102,2 mlrd teńge) jáne Mańǵystaý (101,9 mlrd teńge) oblystarynda da aıtarlyqtaı joǵary.

Aıyrbastaý pýnktterinde eýronyń taza satylymynyń jartysynan kóbi úsh megapolıstiń úlesine tıdi: Almaty (96,7 mlrd teńge), Astana (41,3 mlrd teńge) jáne Shymkent (34,4 mlrd teńge). 2022 jyldyń qańtar-jeltoqsanynda eýroǵa aıtarlyqtaı suranys Batys Qazaqstan oblysynda baıqaldy. Onyń satylymy 27,3 mlrd teńgege jetti. Bul 2021 jyldyń sáıkes kezeńimen salystyrǵanda birden 3,3 ese kóp.