Sherzat Bolattyń ólimi: 2 qyz kúdikti emes
ASTANA. KAZINFORM – Sherzat Bolattyń ólimi oryn alǵan jerde bolǵan 2 qyz kúdikti retinde ustalǵan joq. Bul týraly Qonaev qalasynda ótip jatqan brıfıngte Іshki ister mınıstrliginiń Tergeý departamenti bastyǵynyń orynbasary Samat Aısov aıtty.
Brıfıng barysynda BAQ ókilderi «Sherzattyń ákesi kósheni japqan kezde 2 qyz tergeýde kýáger ekenin aıtqan edi. Qazirgi ýaqytta da osy eki qyz kýáger nemese kúdikti retinde qarastyrylyp otyr ma? Jalpy, osy oqıǵadan keıin jaýapty tulǵalarǵa shara qoldanyldy ma?», - dep suraǵan edi.
Samat Aısovtyń aıtýynsha, atalǵan eki qyzdy ustaýǵa eshqandaı sebep joq.
«Qyzdar boıynsha qazirgi tańda olar kúdikti retinde tanylmady. Oǵan eshqandaı sebep joq. Al qyzmetkerlerge qatysty qyzmettik tekseris ótkiziledi. Ár qyzmetkerdiń isine baǵa berilgennen keıin tolyq aqparat usynamyz», - dedi ol.
Eske salaıyq,4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
