Shavkat Rahmonov oktagonǵa qashan oralady

ASTANA. KAZINFORM — DAR Team komandasynyń bas bapkeri Edýard Bazrov Betonmobile basylymyna bergen suhbatynda qazaqstandyq top-jartylaı orta salmaq ókili Shavkat Rahmonovtyń jaqyn ýaqytta oktagonǵa oralýy yqtımal ekenin málimdedi.

Onyń aıtýynsha, sportshy kún saıyn jattyǵyp júr, al jekpe-jek ne osy jyldyń sońynda, ne kelesi jyldyń basynda ótýi múmkin. Qarsylas ázirge belgisiz.

Bazrovtyń sózine qaraǵanda, UFC Shavkattyń oralýyna múddeli.

«Shavkat jattyǵyp júr, búgin onymen eki jattyǵý ótkizdik. Jumysty jalǵastyryp kelemiz. Barshaǵa belgili oqıǵalarǵa deıin-aq jaqsy qarqyn alǵan edik. Jańa jyldyń aldynda shyǵamyz dep qatty úmittengenbiz, biraq bolǵan is boldy. Biraz ýaqyt Shavkatqa óte aýyr tıdi. Qazir derlik óz-ózine keldi.

Taǵy da qaıtalap aıtamyn: kún saıyn jattyǵamyz, daıyndalyp júrmiz. Jaqyn bolashaqta ony oktagonda kóresizder. Bul ne osy jyldyń sońy, ne kelesi jyldyń basy bolady. Qarsylas týraly ázirge aqparat joq. UFC Shavkattyń oralýyna óte qyzyǵýshylyq tanytyp otyr», – dedi Edýard Bazrov.

Aıta keteıik, jaqynda Shavkat Rahmonovtyń jary men uly jol apatyna túsken bolatyn.