Shardaralyq dárigerler 100-den astam balany tegin súndettedi

ShARDARA. QazAqparat – Túrkistan oblysynyń Shardara aýdanynda aq halatty abzal jandar ıgi iske uıytqy boldy. Kópbalaly jáne áleýmettik az qamtylǵan otbasydan shyqqan 100-den astam balany tegin súndetke otyrǵyzyp, eldiń alǵysyna bólendi, dep habarlaıdy QazAqparat tilshisi.

Igi is aýdandyq ortalyq aýrýhananyń bas dárigeri Nurǵalı Moldahanovtyń bastamasymen júzege asqan. Tuńǵysh ret uıymdastyrylǵan qaıyrymdylyq aktsııasynda aýdandyq ortalyq meshit qyzmetkeri Taýbaı Qadyrov balalarǵa aq batasyn berdi.

Balalardy súndettep, saýapty sharany júzege asyrǵan dárigerlerdiń qatarynda bilikti hırýrgtar bar. Atap aıtsaq, aýrýhananyń hırýrgııa bólimshesiniń meńgerýshisi Janat Baqytova jáne hırýrgtar Jańabaı Orazbaev, Ermahanbet Qalmuratov, Erjan Máýlenov, Qanat Abylbekov, Orynbek Japparov, Damır Taspolatov syndy bilikti otashy dárigerler ıgi istiń basy-qasynan tabyla bildi.

Saýapty sharany uıymdastyrýshylarǵa kópbalaly otbasy músheleri men jergilikti turǵyndar alǵysyn aıtty.

Dál osyndaı ıgi shara Tólebı aýdandyq aýrýhanasynda da jalǵasyn tapty. Onda da dárigerler turmysy tómen otbasy balalaryn bes kún boıy tegin súndettedi.